कोपरगाव प्रतिनिधी
कोपरगाव तालुक्यातील ओम साई ग्रामीण शिक्षण संस्थेचे अध्यक्ष परशराम साबळे यांचे सामाजिक दृष्टीने शिक्षण क्षेत्रातील कार्य समाजासाठी प्रेरणादायी असल्याचे गौरवोद्गार राष्ट्रीय रिपब्लिकन पक्षाचे माजी उपाध्यक्ष व राष्ट्रवादी काँग्रेसचे नेते काकासाहेब खंबाळकर यांनी व्यक्त केले.नुकतेच सिन्नर तालुक्यातील खंबाळे येथे काही कामानिमित्त काकासाहेब आले असता कोपरगाव येथील ओम साई ग्रामीण शिक्षण संस्थेचे संस्थापक अध्यक्ष परशराम साबळे यांनी त्यांची भेट घेत संस्थेतर्फे काकांचा सत्कार करत भावी वाटचालीस शुभेच्छा दिल्या. या प्रसंगी नाशिक चे शिक्षणाधिकारी डी.के.आंधळे,खंबाळे गावचे सरपंच डावरे पाटील, मानव कौशल्य विकास असोसिएशन नाशिक विभागीय प्रमुख महेंद्र झपाटे तसेच गावातील कार्यकर्ते विविध विभागाचे अधिकारी उपस्थित होते.यावेळी साबळे यांनी संस्थेविषयी माहिती देताना सांगितले की, ग्रामिण भागातील विद्यार्थ्यांना व्यावसायिक शिक्षण घेता यावे म्हणून भारत सरकारचे राष्ट्रीय संगणक साक्षरता मिशन, महाराष्ट्र राज्य कौशल्य विकास मंडळ तसेच पुणे परीक्षा मंडळ यांची मान्यता घेत विविध व्यावसायिक अभ्यासक्रम सुरू केले असून आज या द्वारे अनेक विद्यार्थी आपल्या पायावर यशस्वी जीवन जगत आहे. तसेच ग्रामीण भागातील सामान्य कुटुंबातील मुलांना देखील इंग्रजी भाषेचे ज्ञान मिळावे हा उद्देश डोळ्यासमोर ठेवत तालुक्यातील ग्रामीण भागात एकमेव शासन मान्य इंग्रजी माध्यमाची शाळा सुरू करत आज यशस्वीपणे ज्ञान दानाचे कार्य सुरू आहे. यावेळी पुढे बोलतांना साबळे यांनी सांगितले की, संस्थेने नुकताच राष्ट्रीय स्तरावर कार्य करत असलेल्या मानव कौशल्य विकास असोसिएशन या संस्थे सोबत करार केला असून या द्वारे संबंध महाराष्ट्रभर बेरोजगार महिला व पुरुषांना मोफत स्वयंरोजगार घरगुती व्यवसाय करण्याचे प्रशिक्षण देणार असुन सुरुवातीला अहमदनगर, नाशिक व नंदुरबार जिल्ह्यातील प्रत्येक गावागावात मानधन तत्वावर प्रतिनिधी नेमून काम सुरू केले आसल्याची माहिती साबळे यांनी काकासाहेब यांना दिली.यावेळी काकासाहेब
खंबाळकर यांनी ओम साई ग्रामीण शिक्षण संस्था कोपरगाव तर्फे परशराम साबळे करत असलेल्या कार्याबद्दल शुभेच्छा दिल्या.
