कोपरगाव प्रतिनिधी
कोपरगाव शहरातील जे नागरिक आजही हक्काच्या घरापसुन वंचित आहेत अशा वंचित नागरिकांना त्यांच्या हक्काची घरे मिळवून देण्यासाठी आ. आशुतोष काळे यांनी नुकतीच कोपरगाव नगरपरिषदेच्या व म्हाडाच्या अधिकाऱ्यांची बैठक घेतली. या बैठकीत उपस्थित अधिकाऱ्यांना मार्गदर्शन करतांना ते म्हणाले की, सर्वांसाठी घरे हि केंद्र शासनाची योजना आहे. कोपरगाव शहरातील ज्या नागरिकांना हक्काची घरे नाहीत अशा नागरिकांना हक्काची मिळवून देण्यासाठी कोपरगाव नगरपालिकेच्या मालकीच्या बेट भागातील मोकळ्या भूखंडावर या नागरिकांसाठी पंतप्रधान आवास योजने अंतर्गत गरजू लाभार्थ्यांना माफक दरात घरे उपलब्ध करून द्यावी अशा सूचना कोपरगाव नगरपालिका प्रशासनाला यापूर्वीच दिल्या आहेत. त्याबाबतीत म्हाडाच्या अधिकाऱ्यांशी चर्चा करून सविस्तर प्रकल्प अहवाल शासनाकडे पाठवावा. त्यासाठी शासनदरबारी पाठपुरावा करून या नागरिकांना घरकुल मिळावे यासाठी प्रयत्न करणार असल्याचे त्यांनी सांगितले.कोपरगाव शहरामध्ये मंजूर झालेल्या रस्त्यांची कामे व वैशिष्ट्यपूर्ण योजनेतील कामे लवकरात लवकर सुरू करा. नगरपालिका प्रशासनाला राज्यशासनाकडे ज्या अडचणी येतील त्या सोडविण्यासाठी मी कटिबद्ध आहे. शहरविकासाचे सर्व प्रस्ताव तातडीने तयार करून शासनाकडे सादर करा. घरकुल अनुदान, बचत गटाचे अनुदान, फेरीवाल्यांचे अनुदान याबाबत काळजी घेवून हे अनुदान लाभार्थ्यापर्यंत पोहोचेल याची काळजी घ्या. राष्ट्रीय नागरी आरोग्य अभियान अंतर्गत कोपरगाव शहरासाठी ५ आरोग्य केंद्र मिळणार असून त्यासाठी देखील प्रस्ताव तयार करा अशा सूचना आ. आशुतोष काळे यांनी यावेळी कोपरगाव नगरपालिका प्रशासनाला दिल्या. कोपरगाव शहरातील नागरिकांना अपेक्षित असलेली शहरविकासाची मंजूर असलेली सर्व कामे लवकरात लवकर पूर्ण करून हि कामे गुणवत्तापूर्ण कशी होतील याची काळजी घ्या. कोपरगाव शहराचा जिव्हाळ्याचा असलेला पाणी प्रश्न सोडविण्यासाठी शहराला आवर्तनात येणाऱ्या अडचणी सोडविण्यासाठी पाटबंधारे विभागाकडे पाठपुरावा करून सर्व साठवण बंधारे पूर्ण क्षमतेने भरून घेण्यासाठी प्रयत्न करू अशी ग्वाही आ. आशुतोष काळे यांनी यावेळी दिली. यावेळी मुख्याधिकारी शांताराम गोसावी, उपमुख्याधिकारी श्रीमती शिंदे, म्हाडा नाशिक विभागाच्या सौ. पवार,नगर अभियंता शंकर गावित, नगररचना सहाय्यक नितेश मिरीकर, राष्ट्रीय नागरी उपजीविका अभियानचे शहर अभियान व्यवस्थापक रामनाथ जाधव, सी.एल.टी.सी. स्थापत्य अभियंता हर्षवर्धन सुराळकर,कोपरगाव नगरपरिषद वैद्यकीय अधिकारी डॉ. गायत्री कांडेकर, राष्ट्रवादी काँग्रेस पक्षाचे शहराध्यक्ष सुनील गंगूले, नगरसेवक मंदार पहाडे, संदीप पगारे, हाजीमेहमूद सय्यद, रमेश गवळी आदी उपस्थित होते.नगरपरिषदेच्या व म्हाडाच्या अधिकाऱ्यांशी कोपरगाव शहरातील विविध विकासकामांच्या बाबतीत चर्चा करून अडचणी जाणून घेतांना आ. आशुतोष काळे.
