आ. आशुतोष काळेंच्या सूचनेनुसार
झगडे फाटा ते वडगाव पान रस्त्याचे खड्डे बुजविण्यास प्रारंभ
देर्डे फाटा ते भरवस रस्त्यावरचे देखील खड्डे बुजविणार!!

कोपरगाव प्रतिनिधी
    
कोपरगाव तालुक्यातून जात असलेल्या राज्यमार्ग ६५ या मार्गाच्या झगडे फाटा ते वडगाव पान या जवळपास ३५ किलोमीटर अंतरातील मार्गावर अनेक ठिकाणी लहान-मोठे खड्डे पडल्यामुळे अनेक छोटे-मोठे अपघात होत आहेत. या अपघातात अनेक नागरिकांना आपला जीव गमवावा लागला असून अनेकांना कायमचे अपंगत्व आले आहे. याची दखल घेवून आ.आशुतोष काळे यांनी या मार्गावरील खड्डे बुजविण्याच्या दिलेल्या सूचनेनुसार सार्वजनिक बांधकाम विभागाने झगडे फाटा ते वडगाव पान या मार्गावरील कोपरगाव तालुका हद्दीतील खड्डे बुजविण्यास प्रारंभ केला असून नागरिकांमध्ये समाधानाचे वातावरण पसरले आहे.कोपरगाव वरून संगमनेर येथे जाण्यासाठी जवळचा असलेल्या (राज्यमार्ग ६५) संगमनेर-वडगाव पान फाटा–तळेगाव- झगडे फाटा- कोपरगाव या रस्त्याची मागील काही वर्षापासून दुरावस्था झाली आहे. शिर्डीकडून जाणारी वाहतूक देखील या रस्त्याने अनेकवेळा वळविल्यामुळे या रस्त्याची अवस्था अजूनच बिकट होत गेली. आमदार आशुतोष काळे यांनी निवडून येताच मतदारसंघातून जाणाऱ्या झगडे फाटा-तळेगाव-वडगाव पान (राज्य मार्ग ६५) व सावळीविहीर-चास-भरवस-लासलगाव (राज्य मार्ग ७) या रस्त्यासाठी निधी मिळावा यासाठी पाठपुरावा सुरु केला होता. त्या पाठपुराव्याची दखल घेवून सार्वजनिक बांधकाम मंत्रालयाने (राज्य मार्ग ६५) व (राज्य मार्ग ७) या दोनही राज्यमार्गांच्या नूतनीकरणासाठी आशियाई विकास बँक अर्थसहाय्य अंतर्गत पहिल्या टप्प्यात समावेश करण्याची ग्वाही दिलेली असून अर्थसंकल्पात निधीसाठी  तरतूद केली जाणार आहे. मात्र आज रोजी या रस्त्यांची अवस्था अतिशय खराब झाल्यामुळे वाहनचालकांना आपला जीव मुठीत धरून वाहन चालवावे लागत असून खड्डे बुजविण्याची मोहीम हाती घेण्यात आल्यामुळे वाहनचालकांना होणारा त्रास कमी होणार आहे.त्याचबरोबर कोपरगाव तालुक्यातून जात असलेल्या राज्यमार्ग ७ वरील देर्डे फाटा ते भरवस फाटा या रस्त्यावरील देखील अनेक लहान मोठे खड्डे असून त्याचा देखील वाहनचालकांना त्रास होत आहे. त्याबाबत देखील आ. आशुतोष काळे यांनी सार्वजनिक बांधकाम विभागास सूचना देवून देर्डे ते मोर्वीस तालुका हद्दीतील रस्त्यावरील खड्डे बुजविण्याच्या सूचना दिल्या आहेत. त्यासूचनेनुसार या रस्त्यावरील देखील खड्डे देखील लवकरच बुजविणार असल्याचे बांधकाम विभागाचे उपाभियंता प्रशांत वाकचौरे यांनी सांगितले आहे.आ. आशुतोष काळे यांच्या मागणीनुसार झगडे फाटा ते वडगाव पान रस्त्यावरील कोपरगाव तालुका ह्द्दीतीतील रस्त्यावरील खड्डे बुजविण्यास प्रारंभ होणार आहे.