कोपरगाव प्रतिनिधी
कोपरगाव शहरातील नागरिकांना अपेक्षित असलेल्या विकासकामांना मंजुरी मिळालेल्या रस्ते आणि विविध विकासकामांसाठी ३ कोटी ८५ लाख रुपये खर्चास जिल्हाधिकारी डॉ. राजेंद्र भोसले यांनी बुधवार (दि.१५) रोजी प्रशासकीय मान्यता दिली असल्याची माहिती आ. आशुतोष काळे यांनी दिलेल्या प्रसिद्धी पत्रकात देण्यात आली आहे.
राज्यात महाविकास आघाडी सरकार स्थापन झाल्यापासून कोपरगाव विधानसभा मतदार संघातील तसेच कोपरगाव शहरातील रस्त्यांसह विविध कामांना प्रशासकीय मान्यता मिळविल्या आहेत. या विकासकामांना लवकरात लवकर निधी मिळवून विकासकामे सुरु होवून नागरिकांच्या अपेक्षा पूर्ण करण्यासाठी सतत पाठपुरावा सुरु आहे. या पाठपुराव्यातून काही दिवसांपुर्वी कोपरगाव शहरातील रस्ते व विविध विकासकामांना ५ कोटी रुपये खर्चास नगरविकास मंत्रालयाने मंजुरी दिली होती.त्यापैकी शहरातील रस्त्यांच्या कामांना व काही विकासकामांना ३ कोटी ८५ लाख रुपये खर्चास प्रशासकीय मान्यता देण्यात आली आहे. यामध्ये कोपरगाव नगरपरिषद मालकीच्या प्रशासकीय इमारती समोरील उद्यान विकसित करणे, प्रशासकीय इमारतीस संरक्षक भिंत बांधणे, प्रभाग क्रमांक १ मधील खडकी येथील खरे घराजवळील नाल्यावर सीडी वर्क करणे, खैरनार घराजवळ सीडी वर्क करणे, खडकी ते मदरसा रस्ता मजबुतीकरण व डांबरीकरण करणे, प्रभाग क्रमांक २ मधील संदीप शिरोडे घरासमोरील रस्ता डांबरीकरण करणे, प्रभाग क्रमांक ३ मधील नगरपरिषद हद्दीतील लुंबिनी बुद्धविहारकडे जाणारा रस्ता डांबरीकरण करणे, प्रभाग क्रमांक ४ मधील नगर मनमाड हाय वे ते साईधाम मार्ग डांबरीकरण करणे, एस. एस. जी.एम. कॉलेज समोरील रस्त्याचे मजबुतीकरण व डांबरीकरण करणे, प्रभाग क्रमांक ६ मधील आचारी हॉस्पिटल ते छत्रपती श्री संभाजी महाराज सर्कल रस्ता मजबुतीकरण व डांबरीकरण करणे, पंचायत समिती ते आठरे बंगला रस्ता मजबुतीकरण व डांबरीकरण करणे, प्रभाग क्रमांक ९ मधील छत्रपती श्री संभाजी महाराज सर्कल ते धरणगाव रोड नागरे पेट्रोल पंपापर्यंत रस्त्याचे मजबुतीकरण व डांबरीकरण करणे आदी विकासकामांचा सामावेश आहे.
कोपरगाव शहरातील विकासाचा दुष्काळ संपवून नागरिकांना चांगले रस्ते व सुशोभिकरण असलेले कोपरगाव शहर निर्माण करण्यासाठी माझे प्रयत्न सुरु आहेत. त्या पार्श्वभूमीवर शहराच्या विकासासाठी निधी उपलब्ध झाल्यामुळे रस्त्यांची कामे होवून नागरिकांना दिलासा मिळणार आहे. कोपरगाव शहराच्या रखडलेल्या विकासाला चालना देण्यासाठी करीत असलेल्या प्रयत्नांना अपेक्षित यश मिळत असून यापुढे देखील कोपरगाव शहरातील उर्वरित विकासकामांना मंजुरी मिळवून जास्तीत जास्त निधी कसा मिळविता येईल यासाठी मी प्रयत्न करणार आहे. कोपरगाव शहरातील मागील पाच वर्षाचा विकासाचा अनुशेष मोठा असून खराब रस्त्यांमुळे नागरिकांचे हाल होत आहे. त्यामुळे उपलब्ध होणाऱ्या निधीतून या कामांच्या निविदा तातडीने प्रसिद्ध करून विकास कामांना युद्धपातळीवर सुरुवात करावी अशा सूचना कोपरगाव नगरपरिषदेला आ. आशुतोष काळे यांनी केल्या आहेत.
