कोपरगाव तालुका पोलिसांची धडाकेबाज कारवाई; दोन मोबाईल, सोन्याची चैन व पल्सर मोटारसायकल हस्तगत!!
कोपरगाव प्रतिनिधी
शिर्डी–कोपरगाव महामार्गावर रात्रीच्या वेळी वाहनांचा पाठलाग करून चाकू व बंदुकीसारख्या वस्तूचा धाक दाखवत जबरी चोरी करणाऱ्या सराईत टोळीला कोपरगाव तालुका पोलिसांनी जेरबंद केले. पोलिसांनी केलेल्या कारवाईत चार आरोपींना अटक करण्यात आली असून, त्यांच्या ताब्यातून चोरीस गेलेले ओपो व आयफोन कंपनीचे दोन मोबाईल, सोन्याची लेडीज चैन तसेच गुन्ह्यात वापरण्यात आलेली पल्सर मोटारसायकल हस्तगत करण्यात आली आहे.
दिनांक ३० एप्रिल २०२६ रोजी फिर्यादी अजित बुधाजी तोरसकर (वय २८, धंदा-नोकरी, रा. रूम नं. ४०६, चिंतामणी बिल्डिंग नं. ३, गोविंद नगर, गांधी चौक, पुलपाडा रोड, विरार पूर्व) यांनी कोपरगाव तालुका पोलीस ठाण्यात फिर्याद दिली होती. त्यानुसार, ३० एप्रिल रोजी पहाटे चार वाजण्याच्या सुमारास फिर्यादी व त्यांची पत्नी मोटारसायकलवरून शिर्डी येथे दर्शनासाठी जात असताना काळ्या रंगाच्या पल्सर मोटारसायकलवरून आलेल्या तीन अनोळखी इसमांनी त्यांच्या मोटारसायकलचा पाठलाग केला.
आरोपींनी फिर्यादींच्या पत्नीच्या पाठीवरील बॅग ओढून मोटारसायकल थांबविण्यास भाग पाडले. त्यानंतर मोटारसायकल आडवी उभी करून बंदुकीसारखी काहीतरी वस्तू तसेच चाकूचा धाक दाखविला. फिर्यादींकडील ओपो व आयफोन कंपनीचे दोन मोबाईल फोन आणि गळ्यातील सोन्याची लेडीज चैन जबरीने काढून घेतली. तसेच मोटारसायकलची चावी घेऊन आरोपी पसार झाले होते. याप्रकरणी कोपरगाव तालुका पोलीस ठाण्यात गुन्हा रजिस्टर नंबर १६४/२०२६, बीएनएस कलम ३०९(४), ३(४) प्रमाणे गुन्हा दाखल करण्यात आला होता.गुन्ह्याचा तपास सुरू असताना पोलिसांनी तांत्रिक पुराव्याच्या आधारे महेश सिताराम चंदनशिव यास ताब्यात घेतले. त्याच्याकडे चौकशी केली असता सदर मोबाईल त्याचा जोडीदार काळू उर्फ संतोष शामराव दळवी (रा. हिंगणी, ता. कोपरगाव) याने दिला होता. मोबाईल चालत नसल्याने तो पुन्हा संतोष दळवी याला परत दिल्याची माहिती त्याने पोलिसांना दिली.
या माहितीच्या आधारे पोलिसांनी हिंगणी–दर्डे चांदवड रस्त्यावर सापळा रचून काळू उर्फ संतोष शामराव दळवी यास ताब्यात घेतले. चौकशीदरम्यान त्याने आपले साथीदार राजू संजय बर्डे (वय २५, रा. दर्डे चांदवड), किरण बाळू जाधव (वय २७, रा. दर्डे चांदवड) व अमोल राजू राजपूत (वय २२, रा. कोळपेवाडी) यांच्या साथीने सदर गुन्हा केल्याची कबुली दिल्याचे पोलिसांनी सांगितले.
चोरीचा मुद्देमाल पोलिसांच्या हाती
त्यानंतर पोलिसांनी संबंधित आरोपींना गुन्ह्यात अटक करून त्यांच्या ताब्यातून फिर्यादींकडून जबरीने चोरून नेलेले ओपो व आयफोन कंपनीचे दोन मोबाईल फोन हस्तगत केले. तसेच फिर्यादींच्या गळ्यातील जबरीने चोरून नेलेली सोन्याची लेडीज चैन आणि गुन्ह्यात वापरलेली पल्सर मोटारसायकलही पोलिसांनी हस्तगत केली आहे.
आरोपींविरुद्ध यापूर्वीही गुन्हे
सदर गुन्ह्यातील आरोपी काळू उर्फ संतोष शामराव दळवी हा सराईत गुन्हेगार असून, त्याच्याविरुद्ध कोपरगाव तालुका व कोपरगाव पोलीस ठाण्यात यापूर्वी विविध गुन्हे दाखल असल्याचे पोलिसांनी सांगितले. त्याच्याविरुद्ध गुन्हा रजिस्टर नं. १३/२०२६ भादवि कलम ३२५, ४२० तसेच गुन्हा रजिस्टर नं. २४४/२०२३ भादवि कलम ३७९ व गुन्हा रजिस्टर नं. २४१/२०२३ भादवि कलम ३७९, आर्म अॅक्ट ३/२५ प्रमाणे गुन्हे दाखल आहेत.
आरोपी राजू संजय बर्डे याच्याविरुद्धही कोपरगाव तालुका पोलीस ठाण्यात गुन्हा रजिस्टर नं. २२२/२०२२ भादवि कलम ३७९, ५११, ३४ प्रमाणे गुन्हा दाखल असल्याची माहिती पोलिसांनी दिली.ही कौतुकास्पद कामगिरी मा. पोलीस अधीक्षक श्री. मुम्मका सुदर्शन, मा. अपर पोलीस अधीक्षक श्री. सोमनाथ वाकचौरे, उपविभागीय पोलीस अधिकारी शिर्डी विभाग श्री. अमोल भारती यांच्या मार्गदर्शनाखाली तपासी अधिकारी पोलीस निरीक्षक श्री. संभाजी गायकवाड यांच्या नेतृत्वाखाली करण्यात आली.
या कारवाईत पोहेकॉ/१२२ मधुसूदन दहिफळे, पोना/रघुवीर कारखले, पोकॉ/अविनाश तमनर, पोकॉ/जयदीप गवारे, पोकॉ/अमोल फटांगरे, पोकॉ/राम खारतोडे, पोकॉ/रशीद शेख धनाड तसेच अपर पोलीस अधीक्षक कार्यालय, श्रीरामपूर येथील अधिकारी व कर्मचाऱ्यांनी सहभाग घेतला.
