कोपरगाव प्रतिनिधी
रयत शिक्षण संस्थेचे अध्यक्ष खा.शरदचंद्रजी पवार यांच्या अध्यक्षतेखाली संस्थेच्या मॅनेजिंग कौन्सिलच्या बैठकीत कोपरगावचे आमदार आशुतोष काळे यांची मॅनेजिंग कौन्सिल सदस्यपदी निवड करण्यात आली आहे. रयत शिक्षण संस्थेच्या उत्तर विभागाची जबाबदारी सांभाळतांना केलेल्या उल्लेखनीय कार्याची दखल घेत त्यांच्यावर ही महत्त्वाची जबाबदारी सोपविण्यात आली आहे.रयत शिक्षण संस्थेशी काळे परिवाराचे अनेक दशकांपासूनचे अतूट नाते आहे. माजी खासदार कर्मवीर शंकररावजी काळे साहेबांनी कोपरगाव सहकारी साखर कारखान्याच्या माध्यमातून संस्थेला विविध प्रकारे सहकार्य करत रयतच्या शैक्षणिक विस्ताराला हातभार लावला. संस्थेच्या चेअरमनपदाची सलग पंधरा वर्षे जबाबदारी सांभाळताना रयतच्या विस्तारात महत्त्वपूर्ण योगदान दिले. त्यांच्या कार्याचा वारसा माजी आमदार अशोकराव काळे यांनी पुढे नेत संस्थेच्या शाळा-महाविद्यालयांच्या विविध प्रश्न,अडीअडचणी सातत्याने सोडविल्या. हि परंपरा पुढे घेवून जातांना आमदार आशुतोष काळे यांनीही संस्थेचे अध्यक्ष खा.शरदचंद्रजी पवार साहेब यांच्या मार्गदर्शनाखाली रयतच्या उत्तर विभागाची जबाबदारी स्वीकारल्यानंतर संस्थेच्या विकासासाठी उल्लेखनीय योगदान दिले.रयत शिक्षण संस्थेचे संस्थापक पद्मविभूषण डॉ.कर्मवीर भाऊराव पाटील यांच्या शिक्षणविषयक विचारांना केंद्रस्थानी ठेवून काळे परिवाराने रयतला नेहमीच मातृसंस्था मानले आहे. उच्चशिक्षित असलेल्या आमदार आशुतोष काळे यांनी रयत शिक्षण संस्थेच्या उत्तर विभागाची जबाबदारी समर्थपणे सांभाळताना शैक्षणिक गुणवत्ता आणि दर्जा उंचावण्यासाठी सातत्याने प्रयत्न केले.त्यांच्या दूरदृष्टीपूर्ण नेतृत्वातून आणि वेळोवेळी घेतलेल्या धोरणात्मक निर्णयांतून विद्यार्थ्यांना गुणवत्तापूर्ण शिक्षणासोबतच नव्या संधी उपलब्ध करून देण्यावर त्यांनी भर दिला. त्यामुळे उत्तर विभागाच्या शैक्षणिक वाटचालीला नवी दिशा मिळाली असून, गुणवत्ता आणि संधी यांचा समतोल साधणारा प्रभावी ठसा त्यांच्या कार्यातून उमटला. त्यांच्या या कार्याची खा.शरदचंद्रजी पवार यांनी विशेष दखल घेत त्यांची मॅनेजिंग कौन्सिल सदस्यपदी निवड केली आहे. त्यांच्या अनुभवाचा आणि कार्यक्षमतेचा संस्थेच्या आगामी वाटचालीत निश्चितपणे उपयोग होणार आहे.
कर्मवीर भाऊराव पाटील आणि कर्मवीर शंकररावजी काळे साहेबांनी जपलेल्या विचारांचा वारसा पुढे नेण्याची जबाबदारी पुन्हा माझ्यावर सोपविण्यात आली, हा माझ्यासाठी सन्मानासोबतच भावनिक क्षण आहे. आदरणीय खा.शरदचंद्रजी पवार साहेबांनी माझ्यावर दाखविलेला विश्वास आणि रयत परिवाराने दिलेले प्रेम ही माझी मोठी ताकद आहे. काळे परिवाराच्या संस्कारांचा वारसा जपत रयत शिक्षण संस्थेच्या प्रगतीसाठी आणि विद्यार्थ्यांच्या उज्ज्वल भविष्यासाठी यापुढेही पूर्ण क्षमतेने सदैव कार्यरत राहणार.
