कोपरगाव प्रतिनिधी
क्रीडा व युवा सेवा संचालनालय, महाराष्ट्र राज्य, पुणे यांच्या अंतर्गत जिल्हा क्रीडा कार्यालय, अहिल्यानगर व गौतम पब्लिक स्कूल, गौतमनगर यांच्या संयुक्त विद्यमाने आयोजित शालेय राज्यस्तरीय जवाहरलाल नेहरू हॉकी कप क्रीडा स्पर्धा २०२६-२७चा उद्घाटन सोहळा गौतम पब्लिक स्कूलच्या भव्य हॉकी क्रीडांगणावर उत्साहपूर्ण आणि दिमाखदार वातावरणात संपन्न झाला. स्पर्धेचे उद्घाटन कर्मवीर शंकरराव काळे एज्युकेशन सोसायटीचे चेअरमन तथा माजी आमदार अशोकराव शंकरराव काळे यांच्या हस्ते दीपप्रज्वलन करून करण्यात आले. यावेळी उद्घाटनाचे प्रतीक म्हणून आकाशात प्रतिकात्मक हॉकी स्टिकचे अनावरण करण्यात आले. त्यानंतर प्रमुख पाहुण्यांनी खेळाडूंशी संवाद साधत त्यांची ओळख करून घेतली आणि श्रीफळ फोडून स्पर्धेस प्रारंभ झाला.या प्रसंगी अहिल्यानगर जिल्हा क्रीडा अधिकारी ज्ञानेश्वर खुरंगे, क्रीडा मार्गदर्शक उमेश बडवे, विशाल गर्जे, भगवान पवार, कोपरगाव तालुका क्रीडा अधिकारी प्रवीण कोंडावळे, कर्मवीर शंकरराव काळे एज्युकेशन सोसायटीचे इन्स्पेक्टर नारायणराव बारे, गौतम पब्लिक स्कूलचे प्राचार्य नूर शेख, तसेच विविध संघांचे प्रशिक्षक, खेळाडू, पालक, विद्यार्थी,ग्रामस्थ व हॉकी प्रेमी मोठ्या संख्येने उपस्थित होते.
कार्यक्रमाच्या प्रास्ताविकात जिल्हा क्रीडा अधिकारी ज्ञानेश्वर खुरंगे यांनी केले.गौतम पब्लिक स्कूलच्या क्रीडांगणावर राज्यस्तरीय हॉकी स्पर्धेचे आयोजन होत असल्याबद्दल समाधान व्यक्त केले. “गौतम पब्लिक स्कूलचे भव्य क्रीडांगण हे हॉकीचे माहेरघर म्हणून ओळखले जाते, अशी भावना व्यक्त केली.अहिल्यानगर जिल्ह्यात जवाहरलाल नेहरू हॉकी क्रीडा स्पर्धेचे आयोजन व्हावे, अशी मागणी करण्यात आल्यानंतर कोपरगावचे आमदार आशुतोष काळे यांनी गौतम पब्लिक स्कूलचे भव्य क्रीडांगण राज्यस्तरीय हॉकी स्पर्धेसाठी उपलब्ध करून देत जिल्हा क्रीडा कार्यालयाला सातत्याने सहकार्य केले. त्यामुळे या मैदानावर यापूर्वीही राज्यस्तरीय हॉकी स्पर्धांचे यशस्वीआयोजन करण्यात आले असून यंदाची स्पर्धाही याच मैदानावर होत असल्याचे खुरंगे यांनी सांगितले. खेळाडू आणि प्रशिक्षकांनी स्पर्धेतील शिस्तीचे पालन करून पंचांच्या निर्णयाचा आदर करावा, असे आवाहन केले.
स्पर्धेच्या उद्घाटनानंतर १५ वर्षांखालील गटातील छत्रपती संभाजीनगर विभागाच्या रेजिमेंटल चिल्ड्रन हायस्कूल, छत्रपती संभाजीनगर आणि पुणे विभागाच्या गौतम पब्लिक स्कूल, गौतमनगर या संघांमध्ये पहिला सामना खेळविण्यात आला हा सामना गौतम पब्लिक स्कूलच्या संघाने ५ विरुद्ध ० गोलने खिशात घातला. त्यामुळे संपूर्ण क्रीडांगणावर उत्साहाचे वातावरण निर्माण झाले होते.१५ वर्षांखालील वयोगटात राज्यातील आठ विभागांतील संघांनी सहभाग नोंदविला. त्यामध्ये पुणे विभाग-गौतम पब्लिक स्कूल, गौतमनगर; कोल्हापूर विभाग-संजीवन पब्लिक स्कूल; नांदेड विभाग-खालसा हायस्कूल; नागपूर विभाग-डॉ.बी.आर.आंबेडकर विद्यालय, हिंगणघाट; अमरावती विभाग-श्री साई हायस्कूल, लोहारा, यवतमाळ; मुंबई विभाग- डॉन बॉस्को हायस्कूल; छत्रपती संभाजीनगर विभाग-रेजिमेंटल चिल्ड्रन हायस्कूल आणि नाशिक विभाग-शासकीय इंग्रजी माध्यम आश्रमशाळा या संघांचा समावेश आहे.१७ वर्षांखालील वयोगटात नऊ विभागांतील संघांनी सहभाग घेतला. यामध्ये कोल्हापूर विभाग-डी. सी.नरके विद्यालय; मुंबई विभाग-जी.एन.खालसा कॉलेज; पुणे विभाग-सेंट पॅट्रिक्स हायस्कूल अँड ज्युनिअर कॉलेज; नागपूर विभाग-दीनानाथ हायस्कूल अँड ज्युनिअर कॉलेज, नागपूर; छत्रपती संभाजीनगर विभाग-स्वराज मिलिटरी स्कूल अँड अकॅडमी; लातूर विभाग-श्री दशमेश ज्योत इंग्लिश मीडियम स्कूल अँड ज्युनिअर कॉलेज, नांदेड; अमरावती विभाग-सहकार विद्या मंदिर व महाविद्यालय, बुलढाणा आदी संघांचा सहभाग आहे.या राज्यस्तरीय जवाहरलाल नेहरू हॉकी कप क्रीडा स्पर्धेतील उपांत्य फेरी व अंतिम फेरीचे सामने २९ सप्टेंबर रोजी खेळविण्यात येणार आहे व १७ वर्षाखालील मुलींचे हॉकी सामने ३० सप्टेंबर रोजी खेळविले जाणार असल्याची माहिती गौतम पब्लिक स्कूलचे प्राचार्य नूर शेख यांनी दिली. राज्यस्तरीय स्पर्धेच्या यशस्वी आयोजनासाठी कोपरगाव तालुका क्रीडा समितीचे उपाध्यक्ष तथा गौतम पब्लिक स्कूलचे शारीरिक शिक्षण संचालक व क्रीडा विभाग प्रमुख रमेश पटारे, तसेच राजेंद्र आढाव, इसाक सय्यद, महेश गोंडे, दानिश शेख, अविनाश कोळपे, कु. सार्थक पटारे, कु.गौरी बारवकर, हाऊस मास्टर प्रकाश भुजबळ,नसीर पठाण, आबासाहेब जाधव यांनी विशेष परिश्रम घेतले.कार्यक्रमाचे सूत्रसंचालन सौ.रेखा जाधव यांनी केले. शाळेचे दोन्ही विभागांचे पर्यवेक्षक, शिक्षक, शिक्षकेतर कर्मचारी आणि विद्यार्थ्यांनी स्पर्धेच्या आयोजनासाठी मोलाचे सहकार्य केले.उपस्थित प्रमुख पाहुणे व जिल्हा क्रीडा अधिकारी यांनी गौतम पब्लिक स्कूलच्या व्यवस्थापनाचे, क्रीडा विभागाचे आणि आयोजन समितीचे कौतुक केले. राज्यातील विविध विभागांतील उत्कृष्ट हॉकीपटूंच्या सहभागामुळे गौतमनगरच्या क्रीडांगणावर रंगलेली ही राज्यस्तरीय हॉकी स्पर्धा क्रीडाप्रेमींसाठी विशेष आकर्षण ठरली आहे.राज्यातील विविध विभागांतील गुणवान हॉकीपटू, विजेतेपदासाठीची चुरस आणि गौतम पब्लिक स्कूलच्या भव्य मैदानाची पार्श्वभूमी यामुळे जवाहरलाल नेहरू हॉकी कप स्पर्धा उत्तरोत्तर चांगलीच रंगत जाणार आहे. त्यामुळे सर्वांचे लक्ष २९ व ३० सप्टेंबर रोजी होणाऱ्या उपांत्य आणि अंतिम लढतींकडे लागले असून या स्पर्धेतील विजेते संघ दिल्ली येथे होणाऱ्या राष्ट्रीय स्पर्धेत राज्याचे नेतृत्व करणार आहे.या सामन्यांमध्ये कोणता संघ विजेतेपदाची बाजी मारतो, याची उत्सुकता हॉकी प्रेमींमध्ये शिगेला पोहोचली आहे.
