भाग क्रमांक १३ मधील १५६ मतदारांच्या सुनावण्या; आवश्यक कागदपत्रांची पूर्तता!!
कोपरगाव प्रतिनिधी
कोपरगाव विधानसभा मतदारसंघ क्रमांक २१९ अंतर्गत धामोरी येथील मतदार यादी भाग क्रमांक १३ मध्ये विशेष मतदार पुनरिक्षणांतर्गत नोंदीतील तफावत व जुळणीसंदर्भातील नोटिसा आणि सुनावणी प्रक्रियेला गुरुवार, दि. २५ सप्टेंबर रोजी उत्स्फूर्त प्रतिसाद मिळाला. भाग क्रमांक १३ मधील एकूण १५६ मतदारांच्या सुनावण्या यावेळी घेण्यात आल्या.
सुनावणीसाठी उपस्थित राहिलेल्या मतदारांनी आवश्यक कागदपत्रांची पूर्तता करून मतदार यादीतील नोंदींबाबत आवश्यक स्पष्टीकरण दिले. संबंधित कागदपत्रांची तपासणी करून सुनावणीची कार्यवाही नियोजनबद्ध पद्धतीने पूर्ण करण्यात आली. त्यामुळे या प्रक्रियेत मतदारांचा जागरूक व सक्रिय सहभाग दिसून आला.
सुनावणी प्रक्रिया सुरळीतपणे पार पाडण्यासाठी धामोरी येथील मतदान केंद्रस्तरीय अधिकारी दीपक साबळे, शशिकांत राठोड व दिघे यांनी विशेष नियोजन केले. मतदारांना आवश्यक मार्गदर्शन, कागदपत्रांची तपासणी तसेच सुनावणी प्रक्रियेतील आवश्यक कार्यवाही त्यांनी व्यवस्थितपणे पार पाडली.
सहाय्यक मतदार नोंदणी अधिकारी तथा गटशिक्षणाधिकारी, कोपरगाव श्रीमती पिंकी वाजे यांच्या मार्गदर्शनाखाली सुनावणी प्रक्रिया पार पडली. यावेळी ज्ञानेश्वर सैंदाणे व इरफान शेख (राजू), निवडणूक तांत्रिक सहाय्यक यांनी आवश्यक सहकार्य केले. दिवसभरात झालेल्या सुनावण्यांची माहिती ऑनलाइन पद्धतीने नोंदविण्यात आली.
या संपूर्ण प्रक्रियेला तहसीलदार महेश सावंत यांचे मार्गदर्शन लाभले. त्यांच्या मार्गदर्शनाखाली मतदार यादीतील नोंदींची पडताळणी व आवश्यक कार्यवाही प्रभावीपणे राबविण्यात आली.
मतदार यादी अधिक अचूक, पारदर्शक व अद्ययावत करण्याच्या दृष्टीने विशेष मतदार पुनरिक्षण प्रक्रिया महत्त्वपूर्ण आहे. धामोरी येथील मतदारांनी आवश्यक कागदपत्रांसह उपस्थित राहून दिलेला उत्स्फूर्त प्रतिसाद हा निवडणूक प्रक्रियेतील नागरिकांच्या जागरूक व जबाबदार सहभागाचे द्योतक ठरला.
