श्रीमद्भागवत कथेने रंगणार सात दिवसांचा आध्यात्मिक सोहळा!!
जेऊर कुंभारी वार्ताहर
जेऊर कुंभारी गावातील धार्मिक व अध्यात्मिक परंपरेला उजाळा देणाऱ्या अखंड हरिनाम सप्ताहाचा शुभारंभ श्री मारुती मंदिरात अत्यंत भक्तिमय आणि उत्साहपूर्ण वातावरणात झाला. सप्ताहाचे महापूजन प.पू. रमेशगिरी महाराज यांच्या शुभहस्ते विधिवत संपन्न झाले. यावेळी ग्रामस्थ व भाविकांनी मोठ्या संख्येने उपस्थित राहून हरिनामाचा गजर केला.
महापूजनाच्या प्रसंगी मंदिर परिसरात ‘ज्ञानोबा-तुकाराम’, ‘राम कृष्ण हरी’च्या जयघोषाने भक्तिमय वातावरण निर्माण झाले होते. पहाटेपासूनच मंदिरात दर्शनासाठी भाविकांची उपस्थिती होती. महापूजनानंतर सप्ताहातील विविध धार्मिक कार्यक्रमांना उत्साहात सुरुवात झाली.
दि. १ सप्टेंबर ते ७ सप्टेंबर २०२६ या कालावधीत होणाऱ्या या सप्ताहात दररोज सायंकाळी ६ ते रात्री ८.३० वाजेपर्यंत ह.भ.प. परशुराम महाराज अनर्थे (भोजडकर) यांच्या रसाळ वाणीतून संगीतमय श्रीमद्भागवत कथा आयोजित करण्यात आली आहे. कथा, भजन, हरिपाठ आणि कीर्तनाच्या माध्यमातून भाविकांना अध्यात्मिक ज्ञानाचा व संतविचारांचा लाभ मिळणार आहे.तसेच ग्रामस्थांच्या सहकार्यने रोज पंगती दिल्या जाणार आहे.
तसेच दि. २ सप्टेंबर रोजी सकाळी १० ते १२ वाजता ह.भ.प. वैष्णव महाराज जाधव यांचे काल्याचे कीर्तन होणार असून, त्यानंतर भाविकांसाठी महाप्रसादाचे आयोजन करण्यात आले आहे.
या सप्ताहामुळे जेऊर कुंभारी परिसरात पुढील सात दिवस भक्ती, अध्यात्म आणि हरिनामाचा जागर पाहायला मिळणार असून, ग्रामस्थांनी या धार्मिक सोहळ्यात तन-मन-धनाने सहभागी होण्याचे आवाहन समस्त भजनी मंडळ,
व ग्रामस्थ जेऊर कुंभारी यांच्या वतीने करण्यात आले आहे.
