कोपरगाव प्रतिनिधी
थोरले श्रीमंत बाजीराव पेशवे यांच्या ३२६व्या जयंतीनिमित्त ब्राह्मण सभा, कोपरगाव यांच्या वतीने नुकतेच श्रीमंत बाजीराव पेशवे यांच्या प्रतिमेस पुष्पहार अर्पण करून अभिवादन करण्यात आले.
या कार्यक्रमाच्या निमित्ताने श्रीमंत बाजीराव पेशवे यांच्या पराक्रमाचे, शौर्याचे आणि स्वराज्यविस्तारातील योगदानाचे स्मरण करण्यात आले. अवघ्या ४० वर्षांच्या अल्पायुष्यात त्यांनी आपल्या अद्वितीय युद्धकौशल्याच्या जोरावर मराठा साम्राज्याचा विस्तार उत्तर भारतापर्यंत केला. त्यांच्या धाडसी नेतृत्वामुळे आणि असामान्य पराक्रमामुळे मराठ्यांच्या इतिहासात त्यांचे नाव अजरामर झाले आहे.यावेळी कोपरगाव नगरीचे प्रथम नागरिक, लोकप्रिय नगराध्यक्ष मा. श्री. परागजी संधान यांच्या हस्ते श्रीमंत बाजीराव पेशवे यांच्या प्रतिमेस पुष्पहार अर्पण करून अभिवादन करण्यात आले. याप्रसंगी प्रसिद्ध बांधकाम व्यावसायिक श्री. प्रसादजी नाईक, नगरसेवक मा. श्री. विक्रमादित्य सातभाई, ब्राह्मण सभा कोपरगावचे अध्यक्ष मा. श्री. मकरंद कोऱ्हाळकर सर, सचिव सचिन महाजन यांच्यासह समाजबांधव मोठ्या संख्येने उपस्थित होते.उपस्थित मान्यवरांनी श्रीमंत बाजीराव पेशवे यांच्या शौर्याला व राष्ट्रनिष्ठेला अभिवादन करून त्यांच्या प्रेरणादायी कार्याचा गौरव केला. त्यांच्या पराक्रमाची आणि नेतृत्वाची प्रेरणा आजच्या पिढीने घ्यावी, असे मत यावेळी व्यक्त करण्यात आले.कार्यक्रमाच्या निमित्ताने ब्राह्मण सभा कोपरगावच्या वतीने ऐतिहासिक वारसा, महापुरुषांचे कार्य आणि त्यांच्या विचारांची जपणूक करण्याचा संकल्प व्यक्त करण्यात आला. उपस्थित समाजबांधवांनी एकजुटीने श्रीमंत बाजीराव पेशवे यांच्या स्मृतींना अभिवादन केले.
