कोपरगाव प्रतिनिधी
जल जीवन मिशन योजने अंतर्गत कोपरगाव मतदार संघातील अनेक पाणीपुरवठा योजनांची कामे तांत्रिक अडचणी, प्रशासकीय मंजुरी आणि वाढीव निधीची मंजुरी नसल्यामुळे प्रलंबित आहेत. त्याबाबत बुधवार (दि.८) रोजी पाणीपुरवठा व स्वच्छता मंत्री ना. गुलाबराव पाटील यांच्या अध्यक्षतेखाली मंत्रालयात बैठक संपन्न झाली. या बैठकीत आ.आशुतोष काळे यांनी मतदार संघातील जल जीवन मिशन योजने अंतर्गत अनेक पाणीपुरवठा योजनांच्या कामांना कामांना अतिरिक्त निधी उपलब्ध करून देण्याच्या मागणीबरोबरच पाणी पुरवठा योजनांच्या अडचणीकडे पाणीपुरवठा मंत्री ना.गुलाबराव पाटील यांचे लक्ष वेधले. सर्व परिस्थिती समजावून घेत मंत्री महोदयांनी वाढीव निधी उपलब्ध करून देण्यासाठी सकारात्मक प्रतिसाद देवून तातडीने कार्यवाही करण्याचे निर्देश दिले असल्याची माहिती आमदार आशुतोष काळे यांनी दिली आहे.कोपरगाव मतदार संघातील रखडलेल्या पाणी पुरवठा योजनांना गती मिळावी यासाठी आमदार आशुतोष काळे यांनी पाणीपुरवठा व स्वच्छता मंत्री ना.गुलाबराव पाटील यांच्याकडे विशेष बैठक घेण्याची मागणी केली होती. त्या मागणीनुसार बुधवार (दि.८) रोजी मंत्रालयात बैठकीचे आयोजन करण्यात आले होते.या बैठकीत आमदार आशुतोष काळे यांनी कोपरगाव तालुक्यातील कोळपेवाडी,कुंभारी, मायगाव देवी, सुरेगाव, मळेगाव थडी, धारणगाव, रवंदे, रांजणगाव देशमुख, शिंगणापूर व वारी कान्हेगाव तसेच मतदार संघातील राहाता तालुक्यातील रुई-शिंगवे, पुणतांबा व नपावाडी येथील जल जीवन मिशन योजने अंतर्गत पाणीपुरवठा योजनांच्या कामांना सुधारित प्रशासकीय मान्यता देण्याची मागणी केली. जिल्हा परिषदेच्या माध्यमातून काम पूर्ण झालेल्या पाणी पुरवठा योजनांना साठवण तलाव बांधण्यासाठी निधी देण्यात यावा. यासोबतच कोपरगाव तालुक्यातील पूर्व भागातील उक्कडगाव गोधेगाव, शिरसगाव, सावळगाव, उक्कडगाव, घोयेगाव, तळेगाव-मळे,धोत्रे, तिळवणी, आपेगाव, कासली, लौकी, भोजडे, आदी गावांसाठी नवीन प्रादेशिक पाणीपुरवठा योजना मंजूर करावी. कोकमठाण येथील पाणी पुरवठा योजनेच्या कामास मंजूरी द्यावी तसेच कोकमठाणसह मढी बु., कारवाडी,वेळापुर,ब्राम्हणगांव,धामोरी,टाकळी,मोर्विस,काकड-मल्हारवाडी,पढेगांव,करंजी बु.,खिर्डी गणेश, संवत्सर,धोत्रे,माहेगांव देशमुख,मंजूर,शहाजापूर, नाटेगांव आदी गावातील पाणीपुरवठा योजनेच्या कामासह आवश्यक जागा संपादनास मंजुरी देण्यात यावी. माहेगाव देशमुख येथील जलजीवन मिशन योजनेच्या वाढीव प्रस्तावास मान्यता मिळावी. तसेच जिल्हा परिषदेच्या माध्यमातून काम पूर्ण झालेल्या पाणी पुरवठा योजनांसाठी साठवण तलाव बांधण्यासाठी अतिरिक्त निधी उपलब्ध करून देण्याची मागणी केली. या सर्व मागण्यांना पाणीपुरवठा मंत्री ना.गुलाबराव पाटील यांनी सहमती दिली आहे.कोपरगाव विधानसभा मतदार संघातील विविध पाणीपुरवठा योजनांसाठी आमदार आशुतोष काळे यांनी जवळपास ३०० कोटीचा निधि आणला आहे. परंतु अनेक पाणी पुरवठा योजनांना आवश्यक असणाऱ्या सुधारित प्रशासकीय मान्यता, काही योजनांना साठवण तलावाच्या अडचणी तसेच काही गावांना नवीन पाणी पुरवठा योजना बाबत आमदार आशुतोष काळे यांचा सतत पाठपुरावा सुरु असून विधिमंडळाच्या २०२६ च्या पावसाळी अधिवेशनात पाणी पुरवठा योजनेच्या प्रलंबित प्रस्तावांना मंजुरी देण्यासंदर्भात त्यांनी शासनाचे लक्ष वेधले होते. त्याबाबत वारंवार शासनाकडे पत्रव्यवहारही सुरु असल्याचे पाणीपुरवठा ना.गुलाबराव पाटील यांच्या निदर्शनास आणून दिले. त्यामुळे पाणीपुरवठा मंत्री ना.गुलाबराव पाटील यांनी दखल घेऊन संबंधित अधिकाऱ्यांना प्रशासकीय व तांत्रिक अडचणी सोडवून सर्व प्रस्तावांना तातडीने मंजुरी देण्याचे आदेश दिले असल्याचे आमदार आशुतोष काळे यांनी सांगितले आहे. या बैठकीस पाणीपुरवठा विभागाचे मुख्य अभियंता प्रशांत भामरे, महाराष्ट्र जीवन प्राधिकरणचे सदस्य सचिव श्रीरंग नाईक, अतिरिक्त व्यवस्थापकीय संचालक श्रीम. दीपाली देशपांडे, नाशिक विभागाचे मुख्य अभियंता संतोष गव्हाणकर आदी उपस्थित होते.
कोपरगाव मतदार संघातील पाणी पुरवठा योजनांबाबत पाणीपुरवठा व स्वच्छता मंत्री ना. गुलाबराव पाटील यांच्याशी चर्चा करतांना आमदार आशुतोष काळे.
