कोपरगाव प्रतिनिधी
बांधकाम क्षेत्रात काम करणाऱ्या कामगारांच्या सुरक्षिततेला प्राधान्य देत शिवसेना बांधकाम कामगार सेना, अहिल्यानगर यांच्या वतीने कोपरगाव येथे आयोजित करण्यात आलेला बांधकाम कामगार सुरक्षा किट वाटप सोहळा मोठ्या उत्साहात व दिमाखदार वातावरणात संपन्न झाला. कार्यक्रमास तालुक्यातील विविध भागांतील नोंदणीकृत बांधकाम कामगारांनी मोठ्या संख्येने उपस्थित राहून शासनाच्या या महत्त्वपूर्ण योजनेचा लाभ घेतला.
कोपरगाव येथील पोहेगाव नागरी सहकारी पतसंस्था, गोदाम गल्ली येथे झालेल्या या कार्यक्रमात सुरक्षा किटचे वितरण शिवसेना उत्तर अहिल्यानगर जिल्हाप्रमुख मा. श्री. नितीनराव ओताडे यांच्या शुभहस्ते करण्यात आले. यावेळी शिवसेना बांधकाम कामगार सेना, अहिल्यानगरचे जिल्हाप्रमुख मा. श्री. विशाल शिरसाठ (इंजिनिअर) यांची प्रमुख उपस्थिती लाभली. तसेच शिवसेनेचे पदाधिकारी, बांधकाम कामगार सेनेचे कार्यकर्ते आणि असंख्य लाभार्थी उपस्थित होते.
यावेळी मार्गदर्शन करताना मान्यवरांनी बांधकाम क्षेत्रातील काम हे अत्यंत जोखमीचे असल्याचे सांगून प्रत्येक कामगाराने काम करताना सुरक्षा साधनांचा वापर करणे अत्यावश्यक असल्याचे नमूद केले. अपघात टाळण्यासाठी हेल्मेट, सेफ्टी शूज, रिफ्लेक्टर जॅकेट, हातमोजे, मास्क यांसारख्या सुरक्षा साहित्याचा नियमित वापर केल्यास अनेक दुर्घटना टाळता येऊ शकतात, असे त्यांनी स्पष्ट केले.
कार्यक्रमात नोंदणीकृत बांधकाम कामगारांना सेफ्टी हेल्मेट, सेफ्टी शूज, रिफ्लेक्टर जॅकेट, हातमोजे, मास्क, टॉर्च तसेच इतर आवश्यक सुरक्षा साहित्याचा समावेश असलेले सुरक्षा किट वितरित करण्यात आले. लाभार्थ्यांनी या उपक्रमाबद्दल समाधान व्यक्त करत शिवसेना बांधकाम कामगार सेनेचे आभार मानले.
यावेळी मान्यवरांनी महाराष्ट्र इमारत व इतर बांधकाम कामगार कल्याणकारी मंडळामार्फत राबविण्यात येणाऱ्या विविध कल्याणकारी योजनांची माहिती देत अधिकाधिक कामगारांनी नोंदणी करून शैक्षणिक, वैद्यकीय, सुरक्षा, विमा तसेच इतर शासकीय योजनांचा लाभ घ्यावा, असे आवाहन केले.
कार्यक्रमादरम्यान नितीन इंगळे यांच्या हस्ते इंजिनिअर विशाल शिरसाठ, मच्छिंद्र शार्दूल, यांचा शाल व पुष्पगुच्छ देऊन सत्कार करण्यात आला. यावेळी उपस्थितांनी या उपक्रमाचे कौतुक करत आयोजकांचे अभिनंदन केले.
या कार्यक्रमाचे नियोजन व आयोजन नितीन इंगळे, विशाल जाधव, मच्छिंद्र शार्दूल, गणेश पगारे, किरण चव्हाण आणि देवीदास शार्दूल यांनी केले. लाभार्थ्यांची नोंदणी, सुरक्षा किट वितरण आणि संपूर्ण कार्यक्रमाची व्यवस्था अत्यंत शिस्तबद्ध पद्धतीने पार पडली.
कार्यक्रमाच्या शेवटी उपस्थितांचे आभार नितीन इंगळे यांनी मानले. बांधकाम कामगारांच्या सुरक्षिततेसाठी तसेच त्यांच्या हक्काच्या शासकीय योजनांचा लाभ अधिकाधिक कामगारांपर्यंत पोहोचविण्याचा हा उपक्रम निश्चितच प्रेरणादायी ठरला असून, भविष्यातही असे लोकहिताचे उपक्रम सातत्याने राबविण्यात येणार असल्याची भावना आयोजकांनी व्यक्त केली.
