कोपरगाव प्रतिनिधी
सामाजिक बांधिलकी जपत विद्यार्थ्यांच्या शैक्षणिक प्रगतीला चालना देण्याच्या उद्देशाने जिल्हा परिषद प्राथमिक शाळा, बनकर वस्ती येथे बिपिनदादा कोल्हे यांच्या वाढदिवसानिमित्त विद्यार्थ्यांना वह्यांचे वाटप करण्यात आले. या उपक्रमामुळे विद्यार्थ्यांमध्ये आनंदाचे वातावरण निर्माण झाले.
कार्यक्रमास सरपंच अनुराग भाऊ येवले, उपसरपंच ज्ञानदेव जगधने, ग्रामपंचायत सदस्या रंजनाताई शांताराम बनकर, शांताराम बनकर, शोभाताई बाळासाहेब बनकर, माजी सरपंच बाळासाहेब नामदेव बनकर, प्रविण सांगळे यांच्यासह शाळा व्यवस्थापन समितीचे अध्यक्ष, सदस्य, शिक्षकवृंद, ग्रामस्थ आणि पालक मोठ्या संख्येने उपस्थित होते.
मान्यवरांच्या हस्ते विद्यार्थ्यांना वह्यांचे वाटप करण्यात आले. यावेळी उपस्थितांनी बिपिनदादा कोल्हे यांना वाढदिवसाच्या शुभेच्छा देत त्यांच्या सामाजिक, शैक्षणिक व लोकहिताच्या कार्याचे कौतुक केले. विद्यार्थ्यांच्या गुणवत्तापूर्ण शिक्षणासाठी अशा उपक्रमांची नितांत आवश्यकता असून समाजातील दातृत्वाची भावना वाढीस लागणे गरजेचे असल्याचे मत मान्यवरांनी व्यक्त केले.
कार्यक्रमाचे नियोजन व यशस्वी आयोजन मुख्याध्यापिका वैशाली लोहे, शिक्षक महेंद्र निकम, शिक्षिका प्रियंका जोशी तसेच ग्रामस्थांच्या सहकार्याने करण्यात आले.
यावेळी शांताराम बनकर यांनी मनोगत व्यक्त करताना, “अशा सामाजिक उपक्रमांमुळे विद्यार्थ्यांमध्ये शिक्षणाविषयी उत्साह निर्माण होतो आणि त्यांना पुढे जाण्याची प्रेरणा मिळते,” असे सांगितले.
कार्यक्रमाबद्दल उपस्थितांनी समाधान व्यक्त करत भविष्यातही विद्यार्थ्यांच्या हितासाठी असे उपक्रम सातत्याने राबविण्याची अपेक्षा व्यक्त केली.
