कोपरगाव प्रतिनिधी
देशभरासह महाराष्ट्रात रविवारी राष्ट्रीय प्लस पोलिओ लसीकरण मोहिमेला उत्साहात प्रारंभ झाला. कोपरगाव तालुक्यातील लसीकरण मोहिमेचा शुभारंभ नगराध्यक्ष पराग संधान यांच्या प्रमुख उपस्थितीत पार पडला. विशेष म्हणजे, नगराध्यक्ष पराग संधान यांनी उद्घाटनाचा मान तालुक्यातील युवा उद्योजक तथा कालांश राजगिरा लाडू उद्योगाचे संचालक रोहित काळे यांना देत त्यांच्या सामाजिक योगदानाचा गौरव केला.
या कार्यक्रमास नगरसेवक विनोद राक्षे, राजेंद्र सोनवणे, नगरसेविका विद्याताई सोनवणे, रेणुका काळे, अंगणवाडी सेविका, आशा स्वयंसेविका, शिक्षक, आरोग्य विभागाचे अधिकारी व कर्मचारी तसेच मोठ्या संख्येने पालक उपस्थित होते.
शुभारंभानंतर सुमारे १०० ते १५० बालकांना प्लस पोलिओचे जीवनरक्षक लसीकरण करण्यात आले. पोलिओमुक्त भारताचे स्वप्न साकार करण्यासाठी प्रत्येक पाच वर्षांखालील बालकाला पोलिओचे दोन थेंब देणे आवश्यक असून, पालकांनी या मोहिमेला उत्स्फूर्त प्रतिसाद द्यावा, असे आवाहन यावेळी उपस्थित मान्यवरांनी केले.
यावेळी नगराध्यक्ष पराग संधान यांनी प्लस पोलिओ मोहिमेच्या यशस्वितेसाठी सर्व नागरिकांनी सहकार्य करण्याचे आवाहन केले. उद्घाटनाचा मान दिल्याबद्दल रोहित काळे यांनी नगराध्यक्ष पराग संधान यांचे मनःपूर्वक आभार व्यक्त करत, भविष्यातही समाजोपयोगी उपक्रमांमध्ये सक्रिय सहभाग राहील, अशी भावना व्यक्त केली.
कोपरगाव तालुक्यात सुरू झालेल्या या प्लस पोलिओ मोहिमेला नागरिकांचा उत्स्फूर्त प्रतिसाद लाभत असून, प्रत्येक बालकापर्यंत लसीकरण पोहोचविण्यासाठी आरोग्य विभाग सज्ज असल्याचे यावेळी सांगण्यात आले.
