कोपरगाव प्रतिनिधी
कोपरगाव मतदार संघातील रिक्त असलेल्या ग्रामपंचायतीच्या सदस्य पदाच्या पार पडलेल्या धोत्रे व दहेगाव बोलका ग्रामपंचायतीच्या पोटनिवडणुकीत दोन्हीही सदस्य आमदार आशुतोष काळे गटाचेच निवडून आले असून तत्पूर्वी तीन पैकी दोन सदस्य बिनविरोध निवडून आले होते. त्यामुळे एकूण पाच सदस्य पदाच्या पोटनिवडणुकीत चार सदस्य काळे गटाचे निवडून आल्यामुळे या पोटनिवडणुकीत काळे गटाचा वरचष्मा राहिला असल्याचे दिसून आले.
कोपरगाव तालुक्यातील शिंगणापूर, चांदेकसारे, धोत्रे आणि दहिगाव बोलके या चार ग्रामपंचायतीच्या रिक्त असलेल्या एकूण पाच जागेसाठी पोटनिवडणुकीचा कार्यक्रम जाहीर होवून उमेदवारी अर्ज दाखल करण्यात आले होते. परंतु शिंगणापूर, चांदेकसारे ग्रामपंचायतीच्या सदस्य पदाच्या निवडणुकीत अर्ज माघारीच्या शेवटच्या दिवशी इतर उमेदवारांनी आपले उमेदवारी अर्ज माघारी घेतल्यामुळे चांदेकसारे पोटनिवडणुकीत काळे गटाचे अमोल विठ्ठल माळी व शिंगणापूर पोटनिवडणुकीत काळे गटाच्या सौ.मोनाली साईनाथ जाधव यांची बिनविरोध निवड होवून काळे गटाचे दोन उमेदवार तर कोल्हे गटाचा शिंगणापूरमध्ये एक उमेदवार बिनविरोध निवडून आला होता. व उर्वरित धोत्रे आणि दहिगाव बोलका या दोन ग्रामपंचायतीच्या दोन सदस्यासाठी निवडणूक प्रक्रिया मंगळवार (दि.२८) रोजी पार पडून बुधवार (दि.२९) रोजी कोपरगाव तहसील कार्यालयात झालेल्या मतमोजणीत धोत्रे ग्रामपंचायत पोटनिवडणुकीत सौ.माया किरण माळवदे व दहिगाव बोलका ग्रामपंचायत पोटनिवडणुकीत अनुमती नानासाहेब डोंगरे या काळे गटाच्या दोन्ही उमेदवार निवडून येवून कोल्हे गटाला या पोटनिवडणुकीत अपयश आले असून काळे गटाने आपले वर्चस्व सिद्ध केले आहे.
या नवनिर्वाचित ग्रामपंचायत सदस्यांचे माजी आमदार अशोकराव काळे, आमदार आशुतोष काळे यांनी अभिनंदन केले असून पुढील वाटचालीसाठी शुभेच्छा दिल्या आहेत. मतदारांनी टाकलेला विश्वास सार्थ ठरवून आमदार आशुतोष काळे यांनी दिलेली गावाच्या विकासाची जबाबदारी समर्थपणे पार पाडणार असल्याचे नवनिर्वाचित ग्रामपंचायत सदस्य अमोल विठ्ठल माळी, सौ. मोनाली साईनाथ जाधव, सौ.माया किरण माळवदे व अनुमती नानासाहेब डोंगरे यांनी आपल्या विजयाबद्दल प्रतिक्रिया देतांना सांगितले.
