कोपरगाव प्रतिनिधी
कोपरगाव बस स्थानक येथे ज्येष्ठ नागरिकांसाठी प्रवास सवलतीचे पासेस काढण्यासाठी सध्या केवळ एकच खिडकी कार्यान्वित असल्यामुळे दररोज सकाळी ०७ वाजल्यापासून अनेक ज्येष्ठ नागरिक पासेस मिळविण्यासाठी येथे येत असतात. मात्र बसण्यासाठी जागा, पिण्याच्या पाण्याची सुविधा तसेच पुरेशा खिडक्यांची व्यवस्था नसल्यामुळे त्यांची मोठ्या प्रमाणावर गैरसोय होत असल्याचे निदर्शनास आले आहे.या पार्श्वभूमीवर कोपरगाव नगरपरिषदेचे नगराध्यक्ष पराग संधान यांनी बस स्थानकाला भेट देऊन परिस्थितीची पाहणी केली. यावेळी त्यांनी डेपो मॅनेजर तसेच संबंधित ठेकेदार यांच्याशी चर्चा करून ज्येष्ठ नागरिकांना होणारी गैरसोय तातडीने दूर करण्याबाबत सूचना दिल्या. ज्येष्ठ नागरिकांना दीर्घकाळ उभे रहावे लागू नये यासाठी अतिरिक्त खिडक्या सुरू करून पास वाटप केले जावे तसेच बसण्यासाठी बाक किंवा खुर्च्यांची व्यवस्था करावी, स्वच्छ पिण्याच्या पाण्याची सुविधा उपलब्ध करून द्यावी तसेच पासेस काढण्यासाठी अधिक खिडक्या कार्यान्वित करण्याबाबत प्रशासनाने त्वरित निर्णय घ्यावा अशी चर्चा संधान यांनी केली आहे त्यावर संबंधितांनी सकारात्मक प्रतिसाद दिला आहे.
दरम्यान, मा. आ. स्नेहलताताई कोल्हे यांनी देखील या समस्येची दखल घेत परिवहन मंत्री प्रताप सरनाईक यांना याबाबत माहिती दिली आहे. ज्येष्ठ नागरिकांना होत असलेली गैरसोय लक्षात घेता या विषयावर तातडीने कार्यवाही करण्यात येईल, असे संकेत मंत्री महोदयांनी दिले आहे.नगराध्यक्ष पराग संधान यांनी केलेल्या मागणीची दखल घेत संबंधित ठेकेदाराने बस स्थानक परिसरात पिण्याच्या पाण्याची व्यवस्था तसेच ज्येष्ठ नागरिकांसाठी खुर्च्या उपलब्ध करून देण्याची तयारी दर्शवली आहे. तसेच पासेससाठी अतिरिक्त खिडक्या सुरू करण्याबाबतही प्रशासन सकारात्मक असल्याचे सांगितले आहे.
ज्येष्ठ नागरिकांना सन्मानपूर्वक आणि सुलभ सेवा मिळावी, यासाठी आवश्यक त्या सर्व सुविधा लवकरात लवकर उपलब्ध करून देण्यात याव्यात, अशी अपेक्षा यावेळी व्यक्त करण्यात आली.उपनगराध्यक्ष जितेंद्र रणशूर, आरोग्य सभापती वैभव आढाव, कैलास मंजुळ, संजय उदावंत यासह नगरसेवक पदाधिकारी उपस्थित होते.सदर पासेस मिळण्यासाठी होणारी गर्दी पाहता प्रशासनाने ही सुविधा सेतू केंद्रांवर ऑनलाइन पद्धतीने राबवण्याचा विचार करावा ज्यामुळे नागरिकांची गैरसोय टळून जलद गतीने सदरची प्रक्रिया पार पडण्यास सहकार्य होईल असाही पर्यायाची चर्चा यावेळी करण्यात आली.
