कोपरगाव प्रतिनिधी
तालुक्यातील जिल्हा परिषद प्राथमिक शाळा धारणगाव येथे छत्रपती शिवाजी महाराज यांची जयंती अत्यंत उत्साहात आणि प्रेरणायुक्त वातावरणात साजरी करण्यात आली. कार्यक्रमाच्या अध्यक्षस्थानी गावचे उपसरपंच बाबासाहेब वाघ हे होते. प्रारंभी मान्यवरांच्या हस्ते छत्रपती शिवाजी महाराज यांच्या प्रतिमेचे पूजन करण्यात आले. यावेळी उपसरपंच बाबासाहेब वाघ, दीपक चौधरी, गणेश थोरात, संतोष चौधरी, सुरज रणशूर, निलेश रणशूर, दत्तात्रय वाघ, संदीप पाठक, भागिनाथ सोनवणे आणि देविदास नन्नवरे या सर्व मान्यवरांनी प्रतिमेला पुष्पहार व फुले अर्पण करून अभिवादन केले.
कार्यक्रमाचे प्रास्ताविक मुख्याध्यापक नवनाथ सूर्यवंशी यांनी केले. त्यांनी आपल्या भाषणातून शिवजयंती उत्सवाचे महत्त्व आणि विद्यार्थ्यांमध्ये शिवरायांचे विचार रुजवण्याची गरज व्यक्त केली. त्यानंतर दीपक चौधरी यांनी आपले मनोगत व्यक्त करताना शिवाजी महाराजांच्या अष्टपैलू कार्याची आणि त्यांच्या व्यवस्थापन कौशल्याची सविस्तर माहिती विद्यार्थ्यांना दिली. याप्रसंगी शाळेतील चिमुकल्यांनी शिवकालीन वेशभूषा धारण करून सर्वांचे लक्ष वेधून घेतले होते. जयेश कोकाटे आणि वरद कदम यांनी शिवरायांची वेशभूषा साकारून उपस्थितांची मने जिंकली.
सांस्कृतिक कार्यक्रमात चैताली पाठक, वैष्णवी रणशूर, कार्तिकी थोरात, मनस्वी कदम, सृष्टी मोरे, तनिषा मोरे, कीर्ती सोनवणे, श्रावणी सोनवणे, आराध्या पवार आणि लक्ष्मी जाधव या विद्यार्थिनींनी छत्रपती शिवाजी महाराजांचा पाळणा आणि विविध शिवगीतांवर बहारदार नृत्य सादर करून कार्यक्रमात रंगत आणली. तसेच वैष्णवी रणशूर हिने आपल्या ओघवत्या भाषणातून शिवरायांच्या पराक्रमाचा इतिहास मांडला. या सोहळ्यासाठी अंगणवाडी सेविका वनिता चौधरी, मदतनीस माधुरी ननवरे यांच्यासह मोठ्या संख्येने माता पालक आणि ग्रामस्थ उपस्थित होते. कार्यक्रमाचा समारोप शिक्षिका वैशाली सोनवणे यांनी सर्वांचे आभार मानून केला. ‘जय भवानी, जय शिवाजी’च्या जयघोषाने संपूर्ण शाळा परिसर दुमदुमून गेला होता.
