कोपरगाव प्रतिनिधी
पुस्तकी ज्ञानासोबतच श्रमाचे मूल्य कळावे आणि मुलांमध्ये शेतीविषयी आवड निर्माण व्हावी, या उद्देशाने जिल्हा परिषद प्राथमिक शाळा सोनारी येथे राबविण्यात आलेला ‘परसबाग’ उपक्रम सध्या परिसरात चर्चेचा विषय ठरला आहे. या परसबागेत विद्यार्थ्यांनी पिकवलेल्या ताज्या मेथीच्या भाजीचा आस्वाद नुकताच एका स्नेहभोजनाच्या कार्यक्रमात विद्यार्थ्यांनी घेतला.
शाळेतील विद्यार्थ्यांनी मुख्याध्यापक व शिक्षकांच्या मार्गदर्शनाखाली शाळेच्या परिसरात एक सुंदर परसबाग विकसित केली आहे. यामध्ये कोथिंबीर, मेथी, टोमॅटो आणि कांदे यांची शास्त्रोक्त पद्धतीने लागवड करण्यात आली आहे. विशेष म्हणजे, या बागेची देखभाल, पाणी देणे आणि निगा राखणे ही सर्व कामे विद्यार्थी आवडीने करतात. हिरव्यागार पिकांनी नटलेली ही बाग सध्या सर्वांचे लक्ष वेधून घेत आहे.
केवळ बाग फुलवून न थांबता, मुलांनी पिकवलेला हा शेतीचा मेवा त्यांच्याच आहारात समाविष्ट करण्यात आला. शाळेचे मुख्याध्यापक लतिफखान पठाण व सहशिक्षक सोमनाथ काकडे यांनी विद्यार्थ्यांसाठी एका स्नेहभोजनाचे आयोजन केले होते. या भोजनात परसबागेतील ताजी आणि रसायनमुक्त मेथीची भाजी बनवण्यात आली होती. विद्यार्थ्यांनी आपल्या कष्टाने पिकवलेल्या भाजीचा मनमुराद आनंद लुटला.
हा उपक्रम यशस्वी करण्यासाठी कोपरगाव तालुक्याच्या गटशिक्षणाधिकारी श्रीमती शबाना शेख मॅडम तसेच केंद्रप्रमुख यांचे मोलाचे मार्गदर्शन लाभले. शाळेत राबवल्या जाणाऱ्या अशा विविध उपक्रमांमुळे विद्यार्थ्यांच्या कलागुणांना वाव मिळत असून, पालकांमधूनही या नाविन्यपूर्ण प्रयोगाचे मोठे कौतुक होत आहे.
“मुलांना निसर्गाच्या जवळ नेणारा हा उपक्रम त्यांच्या मनात श्रमप्रतिष्ठा रुजवण्यासाठी अत्यंत महत्त्वाचा आहे. शाळेची ही परसबाग आता केवळ बाग नसून मुलांसाठी एक खुली प्रयोगशाळा ठरली आहे.”
