कोपरगाव प्रतिनिधी
राज्याच्या विकासगाथेत सुवर्णाक्षरांनी नोंद व्हावी असे कार्य असणाऱ्या स्व.अजितदादांनी राजकारण करतांनाही नेहमी समाजहित कसे जोपासले जाईल याचा प्रामुख्याने विचार केला. दूरदृष्टी आणि जनहिताची अखंड तळमळ जपणारे स्व.अजितदादा हे एक प्रभावी व लोकाभिमुख नेतृत्व होते. त्यांनी कोपरगाव मतदार संघाच्या विकासासासाठी मोलाचे योगदान दिले आहे.त्यामुळे त्यांच्या अजोड योगदानाची आठवण कायमस्वरूपी राहून त्यांच्या कार्याची प्रेरणा पुढील पिढ्यांना मिळावी यासाठी कोपरगाव तहसील कार्यालयाच्या प्रशासकीय इमारतीला स्व.अजितदादा पवार यांचे नाव देवून त्यांचा पूर्णाकृती पुतळा तहसील कार्यालयाच्या प्रांगणात उभारावा अशी मागणी आमदार आशुतोष काळे यांनी राज्याचे महसूलमंत्री ना.चंद्रशेखर बावनकुळे यांच्याकडे निवेदनाद्वारे केली आहे.
आमदार आशुतोष काळे यांनी बुधवार (दि.११) रोजी मंत्रालयात महसूलमंत्री ना.चंद्रशेखर बावनकुळे यांची भेट घेवून याबाबत निवेदन दिले आहे.दिलेल्या निवेदनात त्यांनी असे म्हटले आहे की,जनतेच्या मनात अढळ स्थान निर्माण करणाऱ्या स्व.अजितदादांनी आपल्या प्रदीर्घ राजकीय कारकिर्दीत कोपरगाव मतदार संघाच्या सर्वांगीण विकासासाठी नेहमीच सकारात्मक भूमिका घेवून झुकते माप दिले आहे. त्यांच्या दूरदृष्टीमुळे मतदार संघाच्या विकासाला नवी दिशा मिळाली आणि सामान्य नागरिकांच्या जीवनमानात सकारात्मक बदल घडून आला आहे.स्व.अजितदादांच्या सहकार्यातून व माजी आमदार अशोकराव काळे यांच्या प्रयत्नातून कोपरगाव शहरात पंचायत समिती, न्यायालय या प्रशासकीय इमारतींबरोबरच कोपरगाव तहसील कार्यालयाची प्रशस्त इमारत उभी राहिली असून या इमारतींनी कोपरगाव शहराच्या वैभवात भर घातली आहे. तहसील कार्यालय हे तालुक्याच्या प्रशासनाचे केंद्रबिंदू असून दररोज शेकडो नागरिक विविध कामांसाठी येथे येत असतात. तहसील कार्यालयाच्या इमारतीस स्व.अजितदादांचे नाव देवून प्रांगणात त्यांचा पूर्णाकृती पुतळा उभारल्यास त्यांच्या कार्याची प्रेरणा पुढील पिढ्यांना मिळत राहील आणि त्यांच्या योगदानाची आठवण चिरंतन कोपरगावकरांच्या मनात राहणार असल्याचे आमदार आशुतोष काळे यांनी दिलेल्या निवेदनात म्हटले आहे.
