कोपरगाव प्रतिनिधी
धारणगाव येथील जिल्हा परिषद प्राथमिक शाळेतील गरजू आणि हुशार विद्यार्थ्यांसाठी लायन्स क्लब, लिनेस क्लब आणि लिओ क्लब ऑफ कोपरगाव यांच्या संयुक्त विद्यमाने एका विशेष उपक्रमाचे आयोजन करण्यात आले. या उपक्रमात कोपरगाव येथील व्यावसायिक आनंद लोढा आणि स्मिता लोढा यांच्या दातृत्वातून विद्यार्थ्यांना ‘स्वप्नातील बॅग’ म्हणजेच शालेय बॅग व खाऊचे वाटपही करण्यात आले. हा उपक्रम विद्यार्थ्यांच्या चेहऱ्यावर आनंद घेऊन आला असून, यामुळे त्यांना शिक्षणासाठी प्रोत्साहन मिळेल, अशी आशा व्यक्त करण्यात येत आहे.
गरजू विद्यार्थ्यांना मदत
या कार्यक्रमाचा मुख्य उद्देश विद्यार्थ्यांना शिक्षणासाठी प्रोत्साहन देणे आणि त्यांच्या गरजा पूर्ण करून त्यांना मदत करणे हा होता. बॅग मिळाल्यानंतर विद्यार्थ्यांच्या चेहऱ्यावरील आनंद पाहून उपस्थितांनी समाधान व्यक्त केले. हा उपक्रम विद्यार्थ्यांच्या शैक्षणिक प्रगतीला चालना देईल, असा विश्वास संस्थेचे प्रतिनिधी राम थोरे यांनी व्यक्त केला.
हा उपक्रम केवळ बॅग वाटपापुरता मर्यादित नसून, विद्यार्थ्यांना अधिक चांगल्याप्रकारे शिक्षण घेण्यास मदत करेल.अशी आशा सोपान वहाडणे यांनी व्यक्त केली. व सदर उपक्रमाचे कौतुक केले.
या कार्यक्रमाला लायन्स क्लब अध्यक्ष अक्षय गिरमे, लीनेस क्लब अध्यक्ष अंजली थोरे, राम थोरे, सोनाली गिरमे, वर्षाताई झंवर, विक्रांत सोमासे, सरपंच दिपक जाधव,उपसरपंच बाबासाहेब वाघ,तंटामुक्ती अध्यक्ष सोमनाथ वहाडणे, ग्रामपंचायत सदस्य संतोष चौधरी, रमाकांत वाकचौरे, लक्ष्मण चंदनशिव, शाळा व्यवस्थापन समिती अध्यक्ष निलेश रणशूर आदी मान्यवर उपस्थित होते. याप्रसंगी गावातील पालक, ग्रामस्थ, आरोग्य कर्मचारी, अंगणवाडी सेविका व मदतनीस यांचीही उपस्थिती होती.
या कार्यक्रमाचे सूत्रसंचालन मुख्याध्यापक नवनाथ सूर्यवंशी यांनी केले, तर आभार प्रदर्शन शिक्षिका वैशाली सोनवणे यांनी केले.
