कोपरगाव प्रतिनिधी
जिल्हा क्रीडा अधिकारी कार्यालय, पुणे यांच्या वतीने पीसीएमसी पुणे येथे (दि.१९) व (दि.२०) दरम्यान आयोजित करण्यात आलेल्या विभागीय नेहरू हॉकी स्पर्धा मोठ्या उत्साहात संपन्न झाल्या. या स्पर्धेत गौतम पब्लिक स्कूलच्या सब ज्युनिअर हॉकी संघाने अहिल्यानगर जिल्ह्याचे नेतृत्व करतांना नेत्रदीपक कामगिरीचे प्रदर्शन केले.स्पर्धेचा अंतिम सामना गौतम पब्लिक स्कूल विरुद्ध सेंट पेट्रिक्स स्कूल, पुणे (पूणे, शहर) यांच्यात झाला. या सामन्यात आपल्या नावलौकिकाला साजेसा खेळ करत गौतम पब्लिक स्कूल हॉकी संघाने पुणे संघाचा २-० अशा फरकाने पराभव करून विजेतेपद पटकावले असून राज्यस्तरीय स्पर्धेत गौतम पब्लिक स्कूलचा संघ पुणे विभागाचे नेतृत्व करणार असल्याची माहिती शाळेचे प्राचार्य नूर शेख यांनी दिली आहे. गौतम पब्लिक स्कूलचा क्रीडा विश्वात मोठा दबदबा असून विशेषत: हॉकी खेळात गौतम पब्लिक स्कूलच्या संघाने अनेक कीर्तीमान रेकॉर्ड्स आपल्या नावावर केलेले आहेत. तब्बल १५ वेळा गौतमच्या हॉकी संघाने राष्ट्रीय पातळीवर महाराष्ट्र संघाचे नेतृत्व करण्याची किमया केली असून त्याचीच हि पुनरावृत्ती आहे.
शाळेच्या विजेत्या सब-ज्युनिअर हॉकी संघाचे नेतृत्व तन्मय पाटील व उप-कर्णधार जीवन गवारे यांनी केले.स्पर्धेत ओम मुरडनर, कृष्णा सातपुते, नैतिक पवार, सोहम माळी, चैतन्य नरोटे, आदित्य पाटील, मानव देशमुख, पार्थ रायते, प्रतीक मोगल (गोलकीपर) यांनी उत्कृष्ट खेळाचे प्रदर्शन केले. हॉकी संघाच्या खेळाडूंना हॉकी प्रशिक्षक रमेश पटारे यांचे बहुमोल मार्गदर्शन लाभले. संस्थेचे अध्यक्ष मा.आ.अशोकराव काळे, संस्था विश्वस्त आ.आशुतोष काळे, सचिव सौ.चैतालीताई काळे,व्हा.चेअरमन सिकंदर पटेल, सर्व संस्था सदस्य व प्राचार्य नूर शेख यांनी गौतम पब्लिक स्कूलच्या विजेत्या संघाचे व क्रीडा संचालक सुधाकर निलक, हॉकी प्रशिक्षक रमेश पटारे व शाळेच्या क्रीडा विभागाचे अभिनंदन करून राज्यस्तरीय स्पर्धेकरिता शुभेच्छा दिल्या आहेत.
