जेऊर कुंभारी वार्ताहार
आषाढी एकादशीच्या पावन पर्वाचे औचित्य साधून जेऊर कुंभारी येथील जिल्हा परिषद प्राथमिक शाळा, गिरमेवस्ती येथे चिमुकल्या बालवारकऱ्यांच्या दिंडीचे मोठ्या उत्साहात आयोजन करण्यात आले. या दिंडीने संपूर्ण परिसर विठ्ठलनामाच्या गजरात भक्तिमय झाला होता.
या दिंडीमध्ये मुला-मुलींनी पारंपरिक वारकरी वेशभूषा परिधान केली होती. गळ्यात तुळशीमाळा, कपाळी चंदनाचा टिळा, डोक्यावर टोपी आणि हातात टाळ, मृदंग व वीणा घेऊन विद्यार्थी ‘जय हरी विठ्ठल’ नामाचा जयघोष करत अत्यंत उत्साहात पायी चालत होते. त्यांची पाऊले विठ्ठल भक्तीने भारलेली होती.
यावेळी सुदर्शन धिवर या विद्यार्थ्याने भगवान विठ्ठलाची तर श्रावणी पगारे हिने रुक्मिणी मातेची आकर्षक वेशभूषा धारण केली होती, जी सर्वांचे लक्ष वेधून घेत होती. विशेष म्हणजे, विद्यार्थ्यांनी स्वतः बनवलेली आकर्षक पालखी दिंडीचे मुख्य आकर्षण ठरली. परिसरातील अनेक कुटुंबांनी या चिमुकल्या वारकरी दिंडीची भक्तीभावाने पूजा करून त्यांचे कौतुक केले. दिंडीतील विद्यार्थ्यांच्या चेहऱ्यावरचा आनंद ओसंडून वाहत होता, ज्यामुळे वातावरणात चैतन्य निर्माण झाले होते.
या प्रसंगी अनुज ढुमणे यांनी फलकावर रेखाटलेले विठ्ठलाचे अप्रतिम चित्र मुलांच्या खास आकर्षणाचा केंद्रबिंदू ठरले. शाळेचे शिक्षक सुदाम साळुंके यांनी विद्यार्थ्यांना आषाढी एकादशीचे महत्त्व समजावून सांगितले. शाळेच्या मुख्याध्यापिका श्रीमती प्रियंका जोशी यांनी उपस्थितांना आषाढी एकादशीच्या शुभेच्छा देऊन सर्वांचे आभार मानले.
या सोहळ्याला शिक्षक, विद्यार्थी, ग्रामस्थ, पालक आणि अंगणवाडी सेविका मोठ्या संख्येने उपस्थित होते. या दिंडीमुळे गिरमेवस्ती शाळेत भक्तीमय आणि चैतन्यमय वातावरण निर्माण झाले होते.
