जेऊर कुंभारी वार्ताहर
जेऊर कुंभारी गावाचे सुपुत्र आणि आत्मा मालिक शैक्षणिक व क्रीडा संकुलाचे स्थानिक समिती सदस्य श्री. विशाल हनुमंत माळी यांची भारतीय वनसेवा (IFS) मध्ये पदोन्नतीने निवड झाली असून या यशामुळे परिसरात आनंदाचे वातावरण आहे.
विशाल माळी यांनी यापूर्वी नाशिक, धुळे, अमरावती, नागपूर व अहिल्यानगर येथे विभागीय वनाधिकारी (दक्षता विभाग) म्हणून उल्लेखनीय सेवा बजावली आहे. त्यांची निष्ठा, उपक्रमशीलता आणि प्रशासनातील नैपुण्य यामुळे त्यांना अनेक पुरस्कारांनी गौरवण्यात आले आहे. मेळघाट वन्यजीव विभागात ACF असताना त्यांनी वाघांच्या शिकाऱ्यांविरोधात मोठी मोहिम राबवून ५४ पेक्षा अधिक शिकाऱ्यांना परराज्यातून अटक करून त्यांच्यावर कारवाई केली होती. या धाडसी कामगिरीसाठी महाराष्ट्र शासनातर्फे त्यांना सांगली (पळूस) येथे सुवर्णपदक देऊन सन्मानित करण्यात आले होते. या वेळी मा. मुख्यमंत्री, वनमंत्री व सचिव परदेशी साहेब यांनी त्यांच्या कार्याची मुक्तकंठाने प्रशंसा केली होती.
कोल्हापूर येथे कार्यरत असताना त्यांनी राधानगरी व दाजिपूर भागांत लोकसहभागातून बस ट्युरिझम सुरू केला होता. विशेष म्हणजे, आठवड्यातून एक दिवस अपंगांसाठी मोफत पर्यटनाची संधी उपलब्ध करून देत त्यांनी सामाजिक जाणिवेचे उत्तम उदाहरण घडवले. ते धुळे महानगरपालिकेचे माजी आयुक्त व विश्वात्मक जंगली महाराज आश्रम ट्रस्टचे सरचिटणीस हनुमंतराव भोंगळे यांचे सुपुत्र असून, स्वामी मुक्तानंद विद्यालय, येवला येथील १९९४ सालच्या चौथ्या इयत्तेतील माजी विद्यार्थी आहेत. सध्या ते आत्मा मालिक करिअर अकादमी (MPSC व UPSC), कोकमठाण येथे प्रमुख सल्लागार व मार्गदर्शक म्हणून कार्यरत आहेत. श्री. माळी यांच्या यशाबद्दल आत्मा मालिक संस्थेचे अध्यक्ष मा. नंदकुमार सूर्यवंशी, सरचिटणीस मा. हनुमंतराव भोंगळे, सर्व विश्वस्त व पदाधिकारी, विविध शाखांचे प्रमुख, शिक्षकवृंद, शिक्षकेत्तर कर्मचारी, तसेच जेऊर कुंभारी पंचक्रोशीतून हार्दिक शुभेच्छा आणि अभिनंदनाचा वर्षाव होत आहे. त्यांना आत्मा मालिक माऊली व संतगणांचे शुभाशीर्वाद लाभोत, अशी भावना सर्वत्र व्यक्त होत आहे.
