जेऊर कुंभारी (वार्ताहर)-
अंजनेरी पर्वत ते कोपरगाव तालुक्यातील जेऊर कुंभारी येथील मारूती मंदिर पायी ज्योत जेऊर कुंभारी गावात आली असून भाविकांनी तिचे स्वागत केले.
जेऊर कुंभारी येथील जय बजरंग तरुण, भजनी मंडळाने पायी ज्योत आणण्यासाठी १० एप्रिल रोजी मारूती मंदिर येथून प्रस्थान केले आणि ११ एप्रिल रोजी सकाळी ९.३० वाजता ज्योत घेऊन जय बजरंग तरुण मंडळ जेऊर कुंभारी गावात दाखल झाले. या ज्योतीचे ढोल-ताशाच्या गजरात स्वागत करण्यात आले. गेल्या २४ वर्षापासून भद्रा मारूती या ठिकाणावरून ज्योत आणली जात होती. पवनपुत्र हनुमानाचा जन्म अंजनेरी डोंगरावर अंजनी मातेच्या पोटी झाला, असे मानले जाते. म्हणूनच ज्योत आणण्याचे ठरवले. अथक परिश्रमातून १२० किलोमीटरचा प्रवास करून पायी
ज्योती जेऊर कुंभारीत दाखल झाली.
आज जेऊर कुंभारीत हनुमान जन्मोत्सव मोठ्या उत्साहात साजरा केला जाणार आहे. तसेच स्वर सम्राट किशोर महाराज दिवटे यांचे सुश्राव्य कीर्तन व त्यानंतर महाप्रसाद होईल. तरी पंचक्रोशितील सर्व भाविकांनी या ज्ञानामृताचा तसेच महाप्रसादाचा लाभ घ्यावा, असे आवाहन करण्यात आले आहे.
