जेऊर कुंभारी वार्ताहर
दिनांक १९ फेब्रुवारी रोजी कोपरगाव तालुक्यातील डाउच खुर्द येथील जोगेश्वरी इंटरनॅशनल स्कूलमध्ये छत्रपती शिवाजी महाराज यांची जयंती मोठ्या उत्साहात साजरी करण्यात आली. कार्यक्रमाचे सर्व नियोजन इयत्ता पाचवीच्या विद्यार्थ्यांनी केले.
दिनांक १९ फेब्रुवारी म्हणजे आपल्या राजांची जयंती. छत्रपती शिवाजी महाराज हे एक प्रसिद्ध भारतीय राजे आणि मराठा साम्राज्याचे संस्थापक होते. त्यांनी स्वतःचे स्वतंत्र राज्य निर्माण करून मराठा साम्राज्याची स्थापना कशी केली यावर मुलांनी भाषण केले.
शिवाजी महाराज हे मराठी लोकांच्या अस्मितेचा एक अविभाज्य भाग आहेत. आपल्या कारकिर्दीत त्यांनी मुघल साम्राज्य, गोवळकोंड्याची कुतुबशाही, विजापूरची आदिलशाही यांच्याशी युती व शत्रुत्व दोन्ही केले.
गनिमी काव्याच्या सहाय्याने बलाढ्य मुघल व आदिलशाही फौजांचा यशस्वीपणे सामना केला.
यावर मुलांनी भाषण करून शिवाजी महाराजांच्या कारकिर्दीची यशोगाथा सर्वांसमोर मांडली.
छत्रपती शिवाजी महाराज हे महाराष्ट्राच्या शौर्याचे प्रतीक आहेत. महाराष्ट्रातील प्रत्येक व्यक्तीसाठी शिवाजी महाराज हे केवळ एक नाव नसून शौर्य ,समता ,प्रेरणा आणि आस्थेचे केंद्र आहे. स्वराज्य स्थापनेपासून आज पर्यंत महाराष्ट्राचे राजकारण आणि सत्ता हे छत्रपती शिवाजी महाराजांच्या नावाने सुरू असलेले पाहायला मिळते. यावर सविता होन यांनी आपले मनोगत व्यक्त केले.
त्यांच्ये शौर्य आणि कधीही पराभव न स्वीकारण्याची जिद्द, त्यांच्या निर्वाणानंतर देखील आजही लोकांना प्रेरित करते. जसे बाळ शिवाला जिजामातांनी रामायण, महाभारत व भारतीय नेत्यांच्या गौरवशाली कथा सांगून आणि शिक्षण देऊन वाढवले तसेच आजच्या पिढीला आपल्या मुलांना शिवाजी महाराजांच्या कथा सांगून प्रोत्साहित करण्याची अत्यंत गरज आहे.
सदर कार्यक्रमात इयत्ता दुसरीचा विद्यार्थी लिंभूरे शौर्य याने आपल्या कणखर वाणीत शिवगर्जना दिली. या कार्यक्रमाचे प्रास्ताविक स्नेहल होन यांनी केले तसेच सूत्रसंचालन इयत्ता पाचवी चे विद्यार्थी शेख अहद आणि दहे परीक्षित यांनी केले. तसेच शितल होन यांनी आभार व्यक्त केले. कार्यक्रमासाठी संस्थेचे अध्यक्ष भास्कर होन ,सचिव सुनिल होन ,संचालक सागर होन, प्रा. ज्योती खरात, पल्लवी होन ,स्वाती वक्ते ,सविता होन, श्रद्धा होन ,स्नेहल होन , मिनल बोरावके ,शितल होन इ.शिक्षक व मुक्ता तुवर ,प्रीती शिंदे ,वाल्मीक होन ,शिवाजी होन ,सादिक सय्यद ,सोमनाथ पवार इत्यादी शिक्षकेतर कर्मचारी उपस्थित होते.
