कोपरगाव प्रतिनिधी
कोपरगाव तालुका ५२ वे गणित विज्ञान आणि पर्यावरण प्रदर्शन नुकतेच जनता इंग्लिश स्कूल संवत्सर येथे उत्साहात पार पडले. यात नगरपालिका शाळा क्रमांक ६ च्या उपक्रमशील शिक्षिका ज्यांना नुकताच या वर्षीचा राज्यशासनाचा थोर समाजसुधारक क्रांतीज्योती सावित्रीबाई फुले राज्यस्तरीय आदर्श शिक्षिका पुरस्कार मिळाला आहे अशा
सुनिता इंगळे यांनी ही सहभाग नोंदवला होता. वेस्ट इज बेस्ट आनंददायी शिक्षण या त्यांच्या साहित्यास प्राथमिक शिक्षक गटातून प्रथम क्रमांक मिळाला आहे.सदर साहित्य जिल्हास्तरीय प्रदर्शनासाठी पात्र झाले आहे.गेल्या १४ वर्षापासून त्यांचा गणित विज्ञान प्रदर्शनात विद्यार्थ्यांसह सातत्याने सहभाग असतो. मराठी गणित इंग्रजी व इतर विषयातील संकल्पना विद्यार्थ्यांना सोप्या पद्धतीने कशा समजावून सांगता येतील यावर आधारित त्यांची टाकाऊतून टिकाऊ साहित्य निर्मिती असते. त्यांचे साहित्य पाहण्यासाठी विद्यार्थी शिक्षक यांनी गर्दी केली होती.
गोदावरी दूध संघाचे चेअरमन व जिल्हा परिषद सदस्य राजेशजी परजणे,संवत्सर गावाचे उपसरपंच विवेक परजणे, गटविकास अधिकारी संदीप दळवी, उत्कृष्ट वक्ते अमोल चिने, गटशिक्षणाधिकारी श्रीमती शबाना शेख, विस्तार अधिकारी, केंद्रप्रमुख यांच्या प्रमुख उपस्थितीत सन्मानचिन्ह व प्रशस्तीपत्रक देऊन त्यांना गौरविण्यात आले.तसेच राज्य पुरस्कार मिळाल्याबद्दल पंचायत समिती कोपरगाव यांच्यामार्फत त्यांचा यथोचित सन्मान करण्यात आला. त्यांच्या या यशाबद्दल नगरपालिका शिक्षण मंडळाचे प्रशासन अधिकारी श्रीराम थोरात, शाळेच्या मुख्याध्यापिका सविता साळुंके, शिक्षक बँक संचालक माणिक कदम, अनुराधा सोनवणे, शाळा व्यवस्थापन समिती अध्यक्ष अर्चना वाहुळकर व इतर सदस्य, विद्यार्थी, पालक, तालुक्यातील सर्व शिक्षक व व मुख्याध्यापक यांनी अभिनंदन करून शुभेच्छा दिल्या आहेत.
