कोपरगाव प्रतिनिधी
नगरपालिका शाळा क्रं.६ च्या विद्यार्थ्यांनी नुकतीच व्यवसायिकांची मुलाखत या उपक्रमा अंतर्गत लकी मेन्स पार्लर चे मालक सुरेश कदम यांची मुलाखत घेतली. सुरेश कदम यांचे कोपरगाव मध्ये लकी मेन्स पार्लर हे दुकान असून ते कोपरगावकरांना उत्तम सेवा देतात. इयत्ता पाचवीच्या वर्गशिक्षिका सुनिता इंगळे यांनी त्यांच्याशी संपर्क साधून मुलांना व्यवसायाबद्दल माहिती देण्याची विनंती केली. त्यांनी या गोष्टीला लगेच होकार कळवून मुलांना अवश्य घेऊन या असे सांगितले. विद्यार्थी दुकानावर गेल्यानंतर विद्यार्थ्यांनी त्यांना अनेक कुतूहल पूर्ण प्रश्न विचारले. त्यात तुमचे नाव काय आहे?तुमचे शिक्षण किती झाले आहे? तुम्ही हा व्यवसाय किती वर्षापासून करता? हा व्यवसाय करताना तुम्ही किती वेळ काम करता?तुमच्या दुकानांमध्ये किंवा इतर दुकानातही दोन्ही बाजूला आरसे का लावलेले असतात? या व्यवसायासाठी लागणारी साधने तुम्ही कुठून विकत घेता ? तुम्हाला हे काम करायला मनापासून आवडते का? एका दिवसाला तुम्हाला किती रुपये मिळतात ? नोकरी आणि व्यवसायामध्ये काय फरक वाटतो?असे कितीतरी प्रश्न मुलांनी विचारले. श्री. सुरेश कदम यांनी त्यांना अगदी समर्पक उत्तरे देत हसत खेळत वातावरणात दिली.या व्यवसायात त्यांचे मावसबंधू सुहास जगताप हे ही त्यांना कामात मदत करतात. कोणतेही काम कमीपणाचे नसते कष्ट केले तर त्यात नक्की यश मिळते. हा संदेशही द्यायला सुरेश कदम विसरले नाहीत. प्रत्येक शाळेमधून मुलांना शाळेबाहेरचे दैनंदिन अनुभव,विविध दुकानांच्या भेटी व्यावसायिक कौशल्य,अनुभवा आधारित शिक्षण मिळायला हवे असेही त्यांनी आवर्जून सांगितले. प्रश्न विचारणाऱ्या सर्वांचे त्यांनी मनापासून कौतुक केले. व माझ्या दुकानात सर्वांनी नक्की या असे आमंत्रणही दिले. या उपक्रमामध्ये इयत्ता दुसरी ते पाचवीच्या विद्यार्थ्यांनी सहभाग घेतला होता. इयत्ता दुसरीच्या वर्गशिक्षिका अनुराधा सोमासे यांचीही या उपक्रमासाठी मोलाची साथ लाभली. शाळेचे प्रभारी मुख्याध्यापक श्री माणिक कदम यांचे मार्गदर्शन मिळाले. या उपक्रमाचे शाळेच्या मुख्याध्यापिका सविता साळुंके, शालेय व्यवस्थापन समितीचे अध्यक्ष अर्चना वाहूळकर, पालक, ज्या दुकानदारांना भेटी दिल्या त्यांचे मालक व तेथे आलेले सर्व ग्राहक यांनी मनापासून कौतुक केले.
