हरीसन ब्रँच शाळेत स्नेहसंमेलन व बालआनंद मेळावा उत्साहात संपन्न!!
जेऊर कुंभारी वार्ताहर
कोपरगाव तालुक्यातील हॅरिसन ब्रँच शाळेत नुकताच बालआनंद मेळावा मोठ्या उत्साहात घेण्यात आला. सकाळ सत्रात या बालआनंद मेळाव्याचे उदघाटन जेऊर कुंभारी गावच्या सरपंच सुवर्णा पवार यांच्या हस्ते करण्यात आले.यावेळी विद्यार्थ्यांनी पालकांच्या व शिक्षकांच्या मदतीने विविध खाद्यपदार्थ व भाजीपाल्याचे स्टॉल लावले होते. विद्यार्थ्यांच्या व्यावहारिक ज्ञानात भर पडावी म्हणून सदर उपक्रम जिल्हा परिषद शाळांमध्ये राबवले जातात.’आपल्या गावातील हॅरिसन ब्रँच शाळा म्हणजे उपक्रमांची खाण’ अशा शब्दात सरपंच सुवर्णा पवार यांनी शिक्षक, विद्यार्थी व पालकांचे कौतुक केले. सरपंच,पालक, ग्रामस्थ यांनी विद्यार्थ्यांच्या स्टॉलला भेट देऊन त्यांच्याकडून भाजीपाला व खाद्यपदार्थ खरेदी केले.
दुपार सत्रात सायंकाळी ३ ते ७ वाजेपर्यंत स्नेह संमेलनाच्या कार्यक्रमांतर्गत शाळेतील सर्व विद्यार्थ्यांच्या सांस्कृतिक कार्यक्रमाचे आयोजन करण्यात आले होते. यामध्ये विद्यार्थ्यांचे विविध नृत्यविष्कार व नाटिका सादर करण्यात आल्या. यात दिव्यांग विद्यार्थी सुदर्शन कातकडे याच्या नृत्याचे पालकांनी व ग्रामस्थांनी चांगलेच कौतुक करून त्यास बक्षिसे दिली.सदर कार्यक्रमास अध्यक्ष म्हणून सेवानिवृत्त शिक्षक चांगदेव वक्ते होते. स्नेहसंमेलनाचे उदघाटन जेऊर कुंभारी गावच्या सरपंच सुवर्णा पवार शाळा व्यवस्थापन समिती अध्यक्ष संदिप पवार,चांगदेव वक्ते, रोहीत वक्ते यांच्या हस्ते करण्यात आले. कार्यक्रमाचे प्रास्ताविक मुख्याध्यापक नवनाथ सूर्यवंशी व सूत्रसंचालन शिक्षिका मनिषा शिंपी यांनी केले. सदर कार्यक्रम यशस्वी करण्यासाठी शाळेचे दोन्ही शिक्षक,शाळा व्यवस्थापन समिती सर्व सदस्य, पालक व ग्रामस्थ यांनी विशेष मेहनत घेतली.यावेळी मोठ्या प्रमाणात पालक व ग्रामस्थ उपस्थित होते.
