नामदार आशुतोष काळे यांच्या मध्यस्थीने हाजी मेहमूद सय्यद यांचे उपोषण तात्पुरते स्थगित!!

कोपरगाव प्रतिनिधी
कोपरगाव शहरातील गांधीनगर भागातील अनेक विकासाचे प्रश्न नगरपालिकेकडून सुटत नसल्यामुळे माजी नगरसेवक हाजीमेहमूद सय्यद यांनी कोपरगाव नगरपालिकेला आंदोलन करण्याचे लेखी निवेदन दिले होते. त्या निवेदनाची दखल न घेतल्यामुळे आमरण उपोषण करण्याचा देखील इशारा सय्यद यांनी दिला होता. त्याबाबत श्री साईबाबा संस्थानच्या विश्वस्त मंडळाचे अध्यक्ष ना. आशुतोष काळे यांनी यशस्वी मध्यस्थी केल्यामुळे होणारे उपोषण तात्पुरते स्थगित करण्यात आले आहे.
याबाबत सविस्तर वृत्त असे की कोपरगाव शहरातील गांधीनगर व परिसरात विकासाचे अनेक प्रश्न प्रलंबित होते.यामध्ये एस जी विद्यालयाचे रोडचे अर्धवट काम, सार्वजनिक शौचालयाचे अर्धवट काम ,स्वच्छतेसाठी कर्मचाऱ्यांची नेमणूक नाही, ना.आशुतोष काळे यांनी निधी दिलेल्या अंबिका मेडिकल ते दत्तनगर  या रस्त्यावर महत्त्वाच्या ठिकाणी सिमेंट पाईप टाकणे, खड्डा गल्लीतील ब्लॉक बसविणे व गटारीचे अर्धवट काम,गांधीनगर भागातील शौचालय परिसरात मोठ्या प्रमाणात साचलेला कचरा अशा अनेक समस्यांकडे नगरपालिकेने दुर्लक्ष केल्यामुळे संतप्त झालेल्या हाजी मेहमूद सय्यद यांनी कोपरगाव नगरपरिषदेचे पुढे  बेमुदत आमरण उपोषण करण्याचा इशारा दिला होता. त्याबाबत  ना.आशुतोष काळे यांनी मुख्याधिकारी शांताराम गोसावी व हाजी मेहमद सय्यद यांच्यात चर्चा घडवून आणली.त्यावेळी प्रभागातील गांधीनगर परिसरातील प्रश्न मार्गी लावण्याची ग्वाही दिली मुख्याधिकारी शांताराम गोसावी यांनी दिली आहे. त्यामुळे ना.आशुतोष काळे यांचे आभार मानून आमरण उपोषण तात्पुरते स्थगित केले असल्याचे सय्यद यांनी सांगितले आहे.