कोपरगाव प्रतिनिधी
कोपरगाव तालुक्यातील चांदेकसारे येथील न्यू इंग्लिश स्कूलची इमारत समृद्धी महामार्गात बाधित झाली होती. त्याची नुकसान भरपाई म्हणून शाळा इमारत बांधकामासाठी सुमारे साडेतीन कोटी रुपये नुकसानभरपाई ही मिळाली आहे. मात्र या पैशांवरून भारत सेवा संघाचे न्यू इंग्लिश स्कूल स्थानिक स्कूल कमेटी व जुने चांदेकसारे स्कुल कमेटी यांच्यात वाद सुरू आहे. ही बाब न्यायप्रविष्ट असून पैसे न्यायालयात पडून आहेत. त्यामुळे नवीन इमारतीचे काम रखडले आहे. विद्यार्थ्यांना शाळेसाठी कायमस्वरूपी इमारत नसल्याने
गेल्या चार वर्षापासून परिसरातील व गावातील विद्यार्थी पत्र्याच्या शेडमध्ये ज्ञानार्जन करतात. त्यामुळे वादळ वाऱ्यात पत्र्याचे शेड उडून विद्यार्थ्यांच्या जीवाला धोका निर्माण होऊ शकतो. शाळेसाठी एवढ्या मोठ्या प्रमाणात निधी मिळूनही त्याचा उपयोग होत नाही नसल्याने विद्यार्थ्यांचे हाल होत आहेत. त्यामुळे पालकवर्ग संतप्त झाला असून येत्या दहा दिवसात शाळेसंदर्भात निर्णय झाला नाही तर या शाळेला टाळे ठोकण्याचा इशारा शाळा बचाव कृती समितीचे मार्गदर्शक केशवराव होन व भिवराव दहे यांनी दिला आहे.
