कोपरगाव प्रतिनिधी
श्रीक्षेत्र कोपरगांव बेटभागातील राष्ट्रसंत जनार्दन स्वामी मौनगिरी आश्रमात महाशिवरात्र पर्वकाळानिमीत्त सालाबादप्रमाणे याही वर्षी अठरापुराणे कथाकार वेदवेदांग शास्त्री आचार्य, सप्तशृंगी माता माहेर खर्ची आश्रम एरंडोलचे श्री श्री १००८ महामंडलेश्वर स्वामी माधवानंद सरस्वती यांच्या रसाळ वाणीतून 23 फेब्रुवारी ते 2 मार्च पर्यंत दररोज दुपारी ४ ते ६.३० यावेळेत शिवमहापुराण कथा ज्ञानयज्ञाचे आयोजन करण्यात आल्याची माहिती मठाधिपती प.पू. रमेशगिरी महाराज, अध्यक्ष दत्तात्रय बाळकृष्ण होळकर, उपाध्यक्ष विलास यादवराव कोते यांनी एका प्रसिद्धी पत्रकाद्वारे दिली.
त्यांनी पुढे म्हटले आहे की, महाशिवरात्र पर्वकाळात शिवमहापुराणाचे श्रवण महत्वाचे आहे. राष्ट्रसंत जनार्दन स्वामी यांनी श्रमाला प्रतिष्ठा देत सर्वत्र शिवमंदिराची स्थापना केलेली आहे. कोपरगांव बेट भाग ऐतिहासिक व पौराणिक संदर्भासाठी प्रसिद्ध आहे. जनार्दन स्वामींच्या समाधी कार्यस्थळांवर या कार्यक्रमाचे सातत्याने आयोजन केले जाते. महाशिवरात्र पर्वकाळानिमीत्त १ मार्च रोजी रात्रौ ८ ते सकाळी ६ वाजेपर्यंत चार प्रहरातील चार महापूजेचे सार्वत्रिकरित्या आयोजन केले आहे. तेव्हा जास्तीत जास्त भाविकांनी या चारप्रहर पुजेत सामिल होण्यांसाठी आश्रम व्यवस्थापनाशी संपर्क करावा, त्याचप्रमाणे शिवमहापुराण श्रवणासाठी जास्तीत जास्त संख्येने उपस्थीत रहावे असे आवाहन विश्वस्थ अंबादास दादा अंत्रे, त्र्यंबक कृष्णाजी पाटील, रामकृष्ण बंडुजी कोकाटे, अनिल बाप्पासाहेब जाधव, आशुतोष विलासराव पानगव्हाने, सुभाष बापूराव शिंदे, संदिप मोहनराव चव्हाण, अतुल बाबुराव शिंदे व राष्ट्रसंत जनार्दन स्वामी, श्री काशी विश्वनाथ महादेव व गोपालन ट्रस्ट भक्त मंडळाने केले आहे.
