कोपरगाव प्रतिनिधी
जिद्दारी चित्रपट महिलांवर आधारित असून एका महिलेची कहानी यात चित्रित केली आहे. समाजात जगताना महिलांना आलेल्या अडचणीचे वर्णन करताना अनेक संकटांचा सामना करून ती जिद्दीने उभी राहते.या चित्रपटातुन महिलांना येणाऱ्या विविध प्रश्नांची उकल काढली आहे.असे प्रतिपादन कोपरगाव तालुका व्यापारी महासंघाचे कार्याध्यक्ष व बालाजी सुपर मार्केटचे श्री सुधीर डागा यांनी केले.
समता पतसंस्थेच्या स्व.यशवंतराव चव्हाण सहकार सभागृहात ए. आर. माइंडस प्रॉडक्शन प्रस्तुत जिद्दारी या मराठी चित्रपटाच्या पोस्टरचे अनावरण श्री सुधीर डागा व कार्यक्रमाचे अध्यक्ष काका कोयटे आणि उपस्थित प्रमुख पाहुण्यांच्या हस्ते करण्यात आले.प्रसंगी समता महिला बचत गटाच्या अध्यक्षा सौ.सुहासिनी कोयटे, कालांश उद्योगचे श्री रोहित काले,व्यापारी महासंघाच्या धारणगाव रोड शाखेचे अध्यक्ष श्री गुलशनजी होडे, बेस्ट बास्केट सुपर शॉप चे श्री.नितीन भुसारे, बालाजी सुपर शॉपीचे श्री सुधीरजी डागा ,लायन्स क्लब कोपरगावचे अध्यक्ष श्री राम थोरे,चित्रपटाचे डायरेक्टर श्री अमोल शिंदे-होळकर ,सिने अभिनेत्री विदुला बाविस्कर आणि अभिनेता श्री विजयराज अंजन यांची प्रमुख उपस्थिती होती.तर समता महिला बचत गट आणि कालांश राजगिरा लाडू आणि चिक्की यांच्या सर्व महिला उपस्थित होत्या.
जिद्दारी या मराठी चित्रपटाची निर्मिती दीप्ती जाधव शेंदारकर यांची असून लेखक – दिग्दर्शक अमोल आबासाहेब शिंदे होळकर आहेत. संगीत दिग्दर्शक देव – सुचिर यांनी सुहास मुंडे, निखिल राजवर्धन यांच्या गीतांना संगीतबद्ध केले आहे तर ‘जिद्दारी’ मधील गीते आदर्श शिंदे, स्वप्नील बांदोडकर, सोनिया उपाध्याय, अतुल जोशी, राजलक्ष्मी शेंदारकर यांनी आपल्या सुरेल आवाजात गायली आहेत.
चित्रपटाबद्दल अधिक माहिती देताना दिग्दर्शक अमोल आबासाहेब शिंदे-होळकर म्हणाले, जिद्दारी म्हणजे जिद्द. हा चित्रपट शेतकऱ्यांच्या समस्यांवर भाष्य करत असला तरी त्यामध्ये संघर्ष, सस्पेन्स आणि एक सुंदर अशी प्रेमकथा सुद्धा प्रेक्षकांना बघायला मिळणार आहे. या चित्रपटात विदुला बाविस्कर, शुभम तारे, विजय अंजान, रवींद्र सोळंके, रवींद्र ढगे, सुधीर माले, राजश्री पठारे, जयश्री सोनवणे यांच्या भूमिका आहेत. तसेच चित्रपट निर्मात्या दीप्ती जाधव- शेंदारकर म्हणाल्या की, आमचा चित्रपट एक वेगळे कथानक घेऊन प्रेक्षकांच्या भेटीला येत आहे. यामध्ये मराठवड्याची पार्श्वभूमी दाखवण्यात आलेली आहे. चित्रपटाचे कार्यकारी निर्माता अभिजीत कांबळे आहेत,
संकलन अमोल निंबाळकर, पूजा पाटील यांनी केले आहे, तर कला दिग्दर्शनाची जबाबदारी ज्ञानेश अ. शिंदे, सूरज स. शिंदे यांनी सांभाळली आहे.जिद्दारी च्या ट्रेलरला प्रेक्षकांचा उत्स्फूर्त प्रतिसाद मिळाला आहे. शेतकऱ्यांचे प्रश्न मांडणारा हा वेगळ्या धाटणीचा चित्रपट येत्या १८ फेब्रुवारी २०२२ रोजी संपूर्ण महाराष्ट्रात प्रदर्शित होणार आहे.
