कोपरगाव प्रतिनिधी
शासकीय आदेशानुसार प्रत्येक नागरिकांने कोरोना प्रतिबंधक लस घेणे बंधनकारक असतांना काही बेफिकीर नागरीकांना अजूनही या गोष्टीचे गांभिर्य लक्ष्यात येत नसल्याने तहसीलदार विजय बोरुडे यांनी बुधवार दि १५ डिसेंबर रोजी प्रत्यक्ष शहरातील बाजारपेठेत जाऊन आस्थापना मालक, कामगार व बाजारपेठेतील नागरिकांनी लसीकरण केले आहे की नाही याची पाहणी करत मोठ्या प्रमाणात दंडात्मक कारवाई केल्याने नागरिकांची चांगलीच धावपळ झाली आहे.
सविस्तर वृत्त असे की, कोरोना महामारीसोबतच अवघ्या जगात ओमीक्रोन या नव्या संसर्गजन्य आजाराने डोके वर काढले असून यातून बचावासाठी सध्या तरी लसीकरण हाच एकमेव उपाय असल्याने प्रत्येक नागरिकाने लसीचे दोन्ही डोस घेणे बंधनकारक असतांना अजूनही काही बेफिकीर नागरिकांना याचे गांभीर्य लक्षात येत नसल्याने तहसीलदार विजय बोरुडे, पोलिस निरीक्षक वासुदेव देसले यांच्या पथकाने शहरातील अस्थापणात जाऊन त्यां अस्थापनाच्या मालकाची, कामगारांची व तेथे खरेदी करायला आलेल्या ग्राहकांनी कोरोना लसीचे दोन्ही डोस घेतले आहे की नाही याची प्रत्यक्ष प्रमाणपत्र पाहत पाहणी केली. या वेळी अस्थापणातील कामगारांनी लस घेतलेली नसेल तर त्या कामगारांस ५०० रुपये दंड तर दुकान मालकास १०,००० रुपये प्रमाणे कारवाई करण्यात आली तसेच मास्क न वापरणाऱ्या नागरिकां कडून ५०० रुपये प्रमाणे दंडात्मक कारवाई करण्यात आल्याने अनेक दुकानंदार मालकांना प्रशासनाने अचानकपणे लसीकरण तपासणी मोहीम सुरू केल्याने दुकान मालक कामगार व ग्राहकांची मोठ्या प्रमाणात धावपळ झाली.
या वेळी तहसीलदार विजय बोरुडे, कोपरगाव शहर पोलिस निरीक्षक वासुदेव देसले, तालुका वैद्यकीय अधिकारी डॉ विकास घोलप, सहाय्यक पोलीस निरीक्षक दाते, कामगार तलाठी ठेंगडे आप्पा आदी सह महसूल पोलीस अधिकाऱ्यांसह मोठ्या प्रमाणात शासकीय अधिकारी या मोहिमेत सहभागी झाले होते.
