कोपरगाव प्रतिनिधी
ज्या व्यक्तींनी स्वहित बाजूला ठेवून समाजासाठी आपलं आयुष्य वेचलं, त्यांच्या निस्वार्थी समाजसेवेतून समाजहित जोपासलं जावून चांगला समाज निर्माण होण्यास मदत होते अशा व्यक्तींची स्मारके आणि पुतळे उभारली जातात. अशा महान व्यक्तींचे पुतळे त्यांनी केलेल्या समाजकार्याची सातत्याने आठवण देत असतात. त्याप्रमाणे पंचायत समितीच्या प्रांगणात कर्मवीर शंकररावजी काळे यांचा पूर्णाकृती पुतळा उभारला जाणार हे त्यांनी आजीवन केलेल्या निस्वार्थ जनसेवेची पावती असल्याचे प्रतिपादन आ. आशुतोष काळे यांनी केले.कर्मवीर शंकररावजी काळे साहेब यांच्या ९ व्या पुण्यस्मरण दिनानिमित्त पंचायत समिती कोपरगाव येथे कर्मवीर शंकररावजी काळे यांचा पूर्णाकृती पुतळा उभारणी कामाचे भूमीपूजन मा.आ. अशोकराव काळे यांच्या प्रमुख उपस्थितीत व आमदार आशुतोष काळे यांच्या शुभहस्ते पार पडले याप्रसंगी ते बोलत होते. कार्यक्रमाच्या अध्यक्षस्थानी छबुराव आव्हाड होते.यावेळी कोपरगाव तालुका एज्युकेशन सोसायटीचे अध्यक्ष अशोकराव रोहमारे, राज्य सहकारी पतसंस्था फेडरेशनचे अध्यक्ष काकासाहेब कोयटे, गौतम सहकारी बँकेचे चेअरमन बाबासाहेब कोते, नगराध्यक्ष विजय वहाडणे, जिल्हा परिषद सदस्य राजेश परजणे, राजेंद्र जाधव, कर्मवीर शंकरराव काळे मित्र मंडळाचे अध्यक्ष कारभारी आगवण, पद्माकांत कुदळे,सुधाकर आवारे,कैलासशेठ ठोळे, विजय बंब,प्रशांत वाबळे,पंचायत समिती सभापती सौ. पौर्णिमा जगधने, उपसभापती अर्जुनराव काळे, कर्मवीर शंकरराव काळे सहकारी साखर कारखान्याचे उपाध्यक्ष सुधाकर रोहोम, सर्व संचालक मंडळ, राष्ट्रवादीचे जिल्हा परिषद, पंचायत समिती सदस्य, नगरसेवक, राष्ट्रवादी काँग्रेस पक्षाचे पदाधिकारी, कार्यकर्ते नागरिक आदी मान्यवरांसह कर्मवीर शंकररावजी काळे यांच्या समवेत सामाजिक योगदान देणारे जेष्ठ कार्यकर्ते मोठ्या संख्येने उपस्थित होते. यावेळी कर्मवीर शंकररावजी काळे यांच्या सामाजिक, राजकीय वाटचालीत त्यांच्या समवेत सामाजिक योगदान देणाऱ्या जेष्ठ कार्यकर्त्यांचा आ.आशुतोष काळे यांच्या हस्ते सन्मानचिन्ह देवून गौरव करण्यात आला.यावेळी पुढे बोलतांना आ. आशुतोष काळे म्हणाले की, चांगला समाज निर्माण व्हावा यासाठी योग्य प्रेरणा व मार्गदर्शन मिळणे आवश्यक असते. कर्मवीर शंकररावजी काळेसाहेबांनी आजीवन समाजाची निस्वार्थपणे सेवा केली. त्यांच्या निस्वार्थ समाजसेवेची प्रेरणापंचायत समिती आणि तहसील कार्यालयात कामानिमित्त येणाऱ्या नागरिकांना निश्चितपणे मिळणार असून चांगला समाज निर्माण होईल. कर्मवीर शंकररावजी काळे साहेबांनी शिक्षण, सहकार आणि सामाजिक जीवनात जे काही समाजकार्य केले त्यामध्ये त्यांना साथ देणाऱ्या प्रत्येक कार्यकर्त्यांचे अजोड योगदान आहे. त्यामुळे साहेबांच्या पूर्णाकृती पुतळयाच्या उभारणी कामाच्या भूमिपूजन प्रसंगी त्यांचा सन्मान करून त्यांच्या कार्याला व आठवणींना उजाळा दिला त्याबद्दल कर्मवीर शंकरराव काळे मित्र मंडळाचे कौतुक केले. पंचायत समितीच्या प्रांगणात पुतळा उभारण्यासाठी मंजुरी दिल्याबद्दल जिल्हा परिषद, पंचायत समिती, कोपरगाव नगरपरिषदेच्या पदाधिकारी, अधिकारी यांचे आभार मानले.पंचायत समितीच्या प्रांगणात कर्मवीर शंकररावजी काळे साहेब यांचा पुतळा उभारण्यास पंचायत समितीला मंजुरी मिळाल्यानंतर या पुतळा उभारणीच्या कामाचा भूमिपूजन कार्यक्रम घेतांना आ. आशुतोष काळे यांनी स्व. शंकररावजी काळे साहेब यांच्या बरोबर काम केलेले तालुक्यातील राजकीय व राजकारणाच्या पलीकडील सर्व जेष्ठ, श्रेष्ठ कार्यकर्त्यांना सन्मानपूर्वक निमंत्रित केले. आ. आशुतोष काळे यांच्या विनंतीला मान देवून साहेबांच्या सामाजिक कार्याचे साथीदार असलेले नागरिक या कार्यक्रमासाठी बहुसंख्येने उपस्थित होते. आमदार आशुतोष काळे यांनी या व्यक्तींना कार्यक्रमाचे केंद्रस्थानी ठेवून त्यांचा यथोचित सत्कार करून त्यांना कार्यक्रमात सर्वोच्च मान दिला. आ. आशुतोष काळे एवढ्यावरच थांबले नाही. त्यांनी सर्वांना स्वत:च्या हाताने पंगतीत जावून आग्रहाने जेवण देखील वाढले. प्रत्येकाशी मनमोकळा संवाद साधत प्रत्येकाच्या आरोग्याची आपुलकीने विचारपूस केली. एकूणच कोपरगाव तालुक्यात झालेल्या या आगळ्या वेगळ्या कार्यक्रमाची तालुक्यात जोरदार चर्चा सुरु झाली आहे.पंचायत समिती प्रांगणात कर्मवीर शंकररावजी काळे यांच्या पूर्णाकृती पुतळ्याच्या कामाचे भूमिपूजन कार्यक्रम प्रसंगी बोलतांना आ. आशुतोष काळे समवेत मा. आ. अशोकराव काळे व उपस्थित मान्यवर. पंचायत समिती प्रांगणात कर्मवीर शंकररावजी काळे यांच्या पूर्णाकृती पुतळ्याच्या कामाचे भूमिपूजन कार्यक्रम प्रसंगी आवर्जून उपस्थित राहिल्याबद्दल जेष्ठ कार्यकर्त्यांचे आभार मानतांना आ. आशुतोष काळे.
