कोपरगाव प्रतिनिधी
कोपरगाव शहराच्या विकासासाठी आ. आशुतोष काळे यांनी दोनच वर्षात कोट्यावधी रुपयांचा निधी दिला आहे. शहरातील नागरिकांच्या विकासाच्या अनेक अपेक्षा असून या अपेक्षा पूर्ण करण्यासाठी त्यांनी कोपरगाव नगरपरिषदेला शहर विकासाचे अनेक प्रस्ताव तयार करण्यास सांगितले आहेत. हे प्रस्ताव कोपरगाव नगरपरिषद प्रशासनाने तातडीने तयार करून शासनाकडे सादर करावे अशी मागणी राष्ट्रवादी कॉंग्रेसचे नगरसेवक मंदार पहाडे यांनी कोपरगाव नगरपरिषदेच्या सर्वसाधारण सभेत केली.कोपरगाव नगरपरिषदेची सर्वसाधारण सभा मंगळवार (दि.०५) रोजी ऑनलाईन पद्धतीने पार पडली. यावेळी नगरसेवक मंदार पहाडे बोलत होते. ते म्हणाले की, आमदार आशुतोष काळे यांनी नेहमीच कोपरगाव शहराच्या विकासाचा ध्यास डोळ्यापुढे ठेवून बारा कोटींचा निधी शहराच्या विकासासाठी दिला आहे. त्यांच्याकडे शहर विकासाच्या अनेक संकल्पना आहेत. त्यानुसार त्यांनी शहर विकासाचे अनेक प्रस्ताव तयार करण्याच्या सूचना कोपरगाव नगरपरिषदेला दिल्या आहेत. यामध्ये कोपरगाव शहरातील बेघर नागरिकांना त्यांच्या हक्काची घरे मिळवून देण्यासाठी डीपीआर तयार करणे, कोपरगाव शहराला वळसा घालून जात असलेल्या गोदावरी नदीचा किनारा या नदीकिनाऱ्याचे संवर्धन व सुशोभीकरण करणे, शुक्लेश्वर मंदिर व इतरही मंदिरांचा विकास करणे, शहरातील युवा वर्गासाठी इनडोअर गेम हॉल विकसित करून सोयी सुविधा निर्माण करणे, धारणगाव रस्त्याचे काम सुरु करण्यासाठी तातडीने पावले उचलावी, तसेच आ. आशुतोष काळे यांनी कोपरगाव शहरातील विविध समाजबांधवांच्या मंदिरासाठी दिलेल्या निधीतून त्या समाज मंदिरांची कामे सुरु करावीत. तसेच शहरातील ज्या मुख्य रस्त्यांना त्यांनी निधी दिला आहे त्या रस्त्यांची कामे तातडीने सुरू करून नागरिकांना चांगल्या रस्त्याच्या सुविधा उपलब्ध करून द्याव्यात.शहरविकासाच्या बाबतीत जे प्रस्ताव आ. आशुतोष काळे यांनी सुचविलेले आहेत ते प्रस्ताव तातडीने तयार करावे. हे प्रस्ताव लवकरात लवकर शासनाकडे सादर करावे. जेणेकरून या प्रस्तावांना मंजुरी मिळविण्यासाठी आ. आशुतोष काळे पाठपुरावा करून शहरविकासासाठी जास्तीत जास्त निधी आणतील व शहर विकासात भर पडेल यासाठी कोपरगाव नगरपरिषद प्रशासनाने तातडीने कार्यवाही करावी अशी मागणी नगरसेवक मंदार पहाडे यांनी यावेळी केली.
