कोपरगाव प्रतिनिधी
प्रियदर्शनी इंदिरा महिला मंडळाच्या वतीने मंडळाच्या अध्यक्षा सौ. पुष्पाताई काळे यांच्या मार्गदर्शनाखाली मंगळवार (दि.०५) ते शुक्रवार (दि.१५) पर्यंत “जागर स्त्री शक्तीचा” नवरात्र उत्सव साजरा करण्यात येणार असल्याची माहिती जिल्हा सहकारी बँकेच्या माजी संचालिका सौ.चैतालीताई काळे यांनी दिली आहे.मागील वर्षी आलेल्या कोरोना संकटाच्या पार्शवभूमीवर संसर्ग रोखण्यासाठी सर्व सण-उत्सव साजरे करण्यावर सर्वसामान्य नागरिकांना मर्यादा होत्या. त्यामुळे मागील वर्षी सर्व सण अतिशय साध्या पद्धतीने साजरे करण्यात आले. मात्र कोरोनाची दुसरी लाट ओसरल्यानंतर शासनाकडून लॉकडाऊनची बंधने शिथिल करण्यात येवून कोरोनाचे नियम पाळून सण-उत्सव साजरे करण्यास परवानगी देण्यात आली आहे. प्रियदर्शनी इंदिरा महिला मंडळाच्या वतीने दरवर्षी नवरात्र उत्सव साजरा केला जातो मात्र मागील वर्षी कोरोना संकटामुळे हा नवरात्र उत्सव ऑनलाईन पद्धतीने (डिजिटल नवरात्र उत्सव) साजरा करण्यात आला होता मात्र यावर्षी हा उत्सव दरवर्षीप्रमाणे कोपरगाव येथील कृष्णाई मंगल कार्यालय येथे साजरा करण्यात येणार आहे.
मंगळवार (दि.०५) पासून सुरु होणा-या नवरात्र उत्सवानिमित्त महिला भगिनींसाठी योग स्वास्थ्य शिबीर तसेच अनेक स्पर्धा आयोजित करण्यात आल्या आहेत. यामध्ये रांगोळी स्पर्धा, मेहंदी स्पर्धा, केक सजावट स्पर्धा, गव्हाच्या पिठापासून तयार केलेल्या देवीच्या विविध दागिन्यांची स्पर्धा तसेच महिलांचा सर्वात आवडता ‘होम मिनिस्टर’ या कार्यक्रमाचे देखील आयोजन करण्यात आले असून प्रश्नमंजुषा स्पर्धेच्या माध्यमातून महिलाभगिनींना पैठणी जिंकण्याची संधी उपलब्ध करून देण्यात आली आहे. त्याचबरोबर नवरात्रीच्या नऊ दिवसांचे धार्मिक महत्व, विविध दुर्गारुपांचे सादरीकरण, कुंकुमआर्चन, देवीचे पाठ, भजन आदी धार्मिक कार्यक्रम होणार आहे. तसेच सकाळी ९ ते ५ या वेळेत महिलांसाठी कोरोना प्रतिबंधक लसीकरण मोहीम हाती घेण्यात आली असून महिलांचे लसीकरण केले जाणार आहे. तरी सदर कार्यक्रमांचा कोरोनाचे सर्व नियम पाळून महिला भगिनींनी लाभ घ्यावा असे आवाहन सौ.चैतालीताई काळे यांनी केले आहे.
