कोपरगाव प्रतिनिधी
गौतम पब्लिक स्कूलचा १४ वर्षांखालील मुलींच्या व्हॉलीबॉल संघाने विभागीय व्हॉलीबॉल स्पर्धेमध्ये विजय मिळवून या संघाची थेट राज्यस्तरीय शालेय स्पर्धेसाठी निवड झाली असून हा संघ आगामी रत्नागिरी येथे होणाऱ्या राज्यस्तरीय स्पर्धेत पुणे विभागाचे नेतृत्व करणार आहे. याचबरोबर शालेय जिल्हास्तरीय हॉकी स्पर्धेत गौतमच्या १४, १७ आणि १९ वर्षांखालील तिन्ही संघ विजयी झाले असून या संघांची विभागीय स्पर्धेसाठी निवड झाली आहे अशी माहिती शाळेचे प्राचार्य नूर शेख यांनी दिली. व्हॉलीबॉल आणि हॉकीतील विजयामुळे गौतम पब्लिक स्कूलच्या क्रीडा गुणवत्तेची सर्वत्र चर्चा होत आहे.
क्रीडा व युवक सेवा संचालनालय, महाराष्ट्र राज्य, पुणे यांच्या अंतर्गत १५ ऑक्टोबर रोजी सोलापूर जिल्ह्यातील मोहोळ येथे १४ वर्षांखालील मुलींच्या विभागीय व्हॉलीबॉल स्पर्धा पार पडल्या. या अटीतटीच्या स्पर्धेत गौतम पब्लिक स्कूलच्या मुलींनी अहिल्यानगर जिल्ह्याचे प्रतिनिधित्व केले होते. गौतमच्या संघाने पुणे ग्रामीण विरुद्ध उपांत्यपूर्व सामन्यात १५/४ अशी आघाडी घेत विजय मिळवला.उपांत्य सामन्यात सोलापूर ग्रामीण संघाविरुद्ध गौतमच्या संघाने २५/५ असा एकतर्फी विजय मिळवून थेट अंतिम फेरीत धडक मारली. अंतिम लढतीत अहिल्यानगर आणि पुणे ग्रामीण यांच्यात झालेल्या चुरशीच्या सामन्यात, गौतमच्या संघाने २५/१६ अशी मात देत विभागीय स्पर्धेत विजय मिळवला. तब्बल २० वर्षांनंतर कोपरगाव तालुक्याच्या मुलींचा व्हॉलीबॉल संघ राज्यस्तरीय शालेय स्पर्धेत खेळणार आहे. नोव्हेंबरमध्ये रत्नागिरी येथे होणाऱ्या राज्यस्तरीय स्पर्धेत राज्यस्तरीय स्पर्धेत गौतमचा संघ पुणे विभागाचे प्रतिनिधित्व करणार आहे.याच बरोबर गौतम पब्लिक स्कूलच्या हॉकी संघांनीही जिल्हास्तरीय स्पर्धेत आपले वर्चस्व कायम ठेवले आहे.१४, १७ आणि १९ वयोगटांतील संघांनी दणदणीत विजय मिळवला असून या संघाला विभागीय स्पर्धेत अहिल्यानगर जिल्ह्याचे प्रतिनिधित्व करण्याचा बहुमान मिळाला आहे. १४ वयोगटाच्या अंतिम सामन्यात गौतम पब्लिक स्कूलने सोनईच्या यश अकॅडमीचा ३/० असा पराभव केला. १७ वयोगटातील गौतमच्या संघाने सोनईच्या यश अकॅडमीविरुद्ध ३/० असा दणदणीत विजय मिळवून आपले वर्चस्व सिद्ध केले. तसेच १९ वर्षांखालील गटात संगमनेर कॉलेज विरुद्ध झालेल्या अटीतटीच्या अंतिम सामन्यात गौतमच्या खेळाडूंनी नियोजनबद्ध आणि आक्रमक खेळ करत ३-० फरकाने विजय मिळवला.
गौतम पब्लिक स्कूलच्या खेळाडूंनी मिळवलेल्या या नेत्रदीपक यशाबद्दल आमदार आशुतोष काळे यांनी व्हॉलीबॉल संघाचे पुष्पगुच्छ देऊन अभिनंदन केले. याचबरोबर कर्मवीर शंकरराव काळे एज्युकेशन सोसायटीचे चेअरमन मा. आ. अशोकराव काळे, सचिव सौ.चैतालीताई काळे, संथेचे इन्स्पेक्टर नारायण बारे, संस्थेचे सर्व संचालक मंडळ, सदस्य आणि शाळेचे प्राचार्य नूर शेख यांनी हॉकी व व्हॉलीबॉल संघाचे अभिनंदन केले. गौतम पब्लिक स्कूलने हॉकीमध्ये सातत्याने वर्चस्व राखले आहे. परंतु मागील काही वर्षपासून हॉकी बरोबरच क्रिकेट, फुटबॉल, व्हॉलीबॉल, कुस्ती अशा विविध क्रीडा प्रकारातही गौतम पब्लिक स्कूल आपले वर्चस्व निर्माण करीत आहे हि समाधानाची बाब असून शाळेचे प्राचार्य व क्रीडा शिक्षक घेत असलेल्या मेहनतीचे हे फळ असून त्यामुळे गौतमचे संघ राज्यस्तरावर जावून पोहोचले आहे.- सचिव सौ.चैतालीताई काळे.
