कोपरगाव प्रतिनिधी
वाचन हे केवळ ज्ञान मिळविण्याचे साधन नसून व्यक्तिमत्त्व विकासाचा पाया आहे. पुस्तकांच्या वाचनातून विचारांना दिशा मिळते, ज्ञानाची व्याप्ती वाढते आणि जीवनाकडे पाहण्याचा दृष्टिकोन समृद्ध होतो. आजच्या डिजिटल युगातही पुस्तकांचे महत्त्व कायम आहे. विद्यार्थ्यांसह प्रत्येकाने नियमित वाचनाची सवय जोपासावी. वाचन संस्कृती रुजविण्यासाठी कोपरगाव नगरपरिषदेच्या माध्यमातून ‘पुस्तक पेटी वाचन उपक्रम’ राबविण्यात येत आहे. या उपक्रमातून अधिकाधिक नागरिकांपर्यंत पुस्तकांचे महत्त्व पोहोचावे आणि वाचनाची आवड निर्माण व्हावी,असे प्रतिपादन कोपरगावचे नगराध्यक्ष पराग संधान यांनी केले.कोपरगाव नगरपरिषद संचालित भारतरत्न डॉ. बाबासाहेब आंबेडकर सार्वजनिक ग्रंथालयाच्या वतीने १५ ऑक्टोबर रोजी वाचन प्रेरणा दिनानिमित्त ‘पुस्तक पेटी वाचन उपक्रम’ राबविण्यात आला. यावेळी नगराध्यक्ष पराग संधान विद्यार्थ्यांना मार्गदर्शन करताना बोलत होते.‘चला वाचूया, स्वतःला घडवूया’ हा संदेश देत वाचन संस्कृतीला प्रोत्साहन देणे आणि नागरिकांमध्ये वाचनाची आवड निर्माण करणे हा या उपक्रमाचा उद्देश आहे.भारताचे माजी राष्ट्रपती आणि ज्येष्ठ शास्त्रज्ञ डॉ. ए. पी. जे. अब्दुल कलाम यांच्या जयंतीनिमित्त दरवर्षी १५ ऑक्टोबर रोजी वाचन प्रेरणा दिन साजरा केला जातो. या दिनाचे औचित्य साधून सार्वजनिक ग्रंथालयाच्या माध्यमातून पुस्तकांचे महत्त्व अधोरेखित करण्यात येत आहे. विद्यार्थ्यांमध्ये वाचनाची गोडी निर्माण होण्याबरोबरच त्यांच्यात ज्ञानार्जनाची आवड वाढावी आणि वाचन संस्कृतीचा प्रसार व्हावा, यासाठी हा उपक्रम राबविण्यात येत आहे.
याप्रसंगी कोपरगाव नगरपरिषदेचे नगराध्यक्ष पराग संधान यांच्यासह सर्व पदाधिकारी व अधिकाऱ्यांनी डॉ. ए. पी. जे. अब्दुल कलाम यांच्या प्रतिमेचे पूजन करून त्यांना अभिवादन केले.या उपक्रमाचे नियोजन नगरपरिषदेचे मुख्याधिकारी अजित निकित,नगराध्यक्ष पराग संधान आणि शिक्षण, क्रीडा व सांस्कृतिक समितीच्या सभापती संजना उदावंत यांच्या मार्गदर्शनाखाली करण्यात आले आहे. नगरपरिषदेचे सर्व सन्माननीय सदस्य आणि कर्मचारीवृंद या उपक्रमात सहभागी आहेत.विद्यार्थ्यांसह सर्व नागरिकांनी नियमित वाचनाची सवय लावून घ्यावी आणि पुस्तकांशी मैत्री करावी, असे आवाहन नगरपरिषदेच्या वतीने करण्यात आले.यावेळी एम. के. आढाव महाविद्यालयाच्या मुख्याध्यापिका भावना गवांदे, रजनी खैरनार, शबनम खान, माळी सर, सनी गायकर, कैलास साळगट, गोपाळ कोळी आणि माणिक कदम यांच्यासह विविध शाळांचे मुख्याध्यापक उपस्थित होते.
