कोपरगाव प्रतिनिधी
शेतकऱ्यांच्या पाणी पट्टीची मोठ्या प्रमाणात थकबाकी आहे. त्यामुळे अगोदर थकबाकी भरा आणि नंतर सात नंबर अर्ज भरा असे जलसंपदा विभागाकडून सांगण्यात येत आहे. त्यामुळे ज्याप्रमाणे महायुती शासनाने शेतकऱ्यांना कर्जमाफी देण्यात आली, वीज बिल माफ केले त्याप्रमाने शेतकऱ्यांची पाणी पट्टी माफ करण्याबाबत सकारात्मक विचार करून गोदावरी कालव्याच्या लाभक्षेत्रातील शेतकऱ्यांना जास्तीत जास्त आवर्तन मिळावे अशी मागणी आमदार आशुतोष काळे यांनी राज्याचे जलसंपदामंत्री तथा जिल्ह्याचे पालकमंत्री ना.राधाकृष्ण विखे.पा.यांच्याकडे केली असता त्यांनी फक्त चालू पाणी पट्टी भरावी व थकीत पाणी पट्टी बाबतही सकारात्मक निर्णय घेण्यात येईल अशी ग्वाही दिली असून त्यामुळे शेतकऱ्यांच्या थकीत पाणी पट्टीची अडचण दूर झाली आहे.
दुष्काळाच्या पार्श्वभूमीवर कोपरगाव येथे पालकमंत्री ना. राधाकृष्ण विखे.पा.यांच्या प्रमुख उपस्थितीत कोपरगाव मतदार संघाची टंचाई आढावा बैठक पार पडली यावेळी आमदार आशुतोष काळे बोलत होते. ते पुढे म्हणाले की, कोपरगाव मतदार संघातील बहुतांश भागात पिकांचे नुकसान झाले आहे. खरीप हंगामात अशी परिस्थिती आहे, तर रब्बी हंगामात काय परिस्थिती असेल आणि ऊस पिकांचे काय होईल याच्या चिंता शेतकऱ्यांना सतावत आहे. दुष्काळी परिस्थिती असल्यामुळे पाणी जपून वापरणे गरजेचे. खालचे बंधारे भरलेले नाहीत ते पण शेतकरी आहेत याची जाणीव आहे. जलसंपदा मंत्री या नात्याने बंधाऱ्याच्या फळ्या काढून पाणी देण्याचा शब्द दिलेला असेल परंतु पाणी सोडले तर कालव्याचे पाणी कमी होणार आहे याकडे लक्ष वेधले. मतदार संघात लाखाच्यावर पशुधन आहे.त्यासाठी मोठ्या प्रमाणात चाऱ्याची गरज भासणार आहे. ऊस पिकाचे काय होईल याची चिंता असून शेतकऱ्यांचे कारखाने चालवयाचे कसे हा मोठा प्रश्न असून शेतकऱ्यांबरोबर कारखाना कर्मचारी पण अडचणीत येणार असल्याचे त्यांनी सांगितले.
पाणी पुरवठा योजनेबाबत अनेक तक्रारी आहेत. त्याबाबत अनेक वेळा अधिकारी व सबंधित ठेकेदारांसमवेत संयुक्त बैठक घेतली आहे. निधीभावी या योजनांचे कामे थांबलेली असून थोड्या प्रमाणात कामे बाकी आहेत. तर अनेक योजनांमध्ये काही भाग सुटला गेला आहे. त्याबाबत प्रस्ताव दाखल केले असून त्यांना सुधारित प्रशासकीय मान्यता मिळावी यासाठी पाणी पुरवठा मंत्र्यांसमवेत बैठक झालेली आहे. परंतु त्यापुढे कार्यवाही झालेली नाही. टंचाई परिस्थितीचा विचार करून पाणी पुरवठा योजनांची कामे पूर्ण केल्यास पाणी पुरवठा सुरळीत होण्यास मदत होणार आहे, त्याबाबत सकारात्मक विचार करावा. दुष्काळी परिस्थितीची जाणीव सर्व शेतकऱ्यांना असून त्या परिस्थितीला सामोरे जावे लागणार आहे तरी देखील सर्व परिस्थितीचा आढावा घेवून सर्व शेतकऱ्यांना आवर्तनाचा लाभ कसा देता येईल यासाठी जास्तीत जास्त आवर्तन देण्याबाबत देखील सकारात्मक निर्णय घ्यावा व पंचनामे व पिक कापणी प्रयोगातून राज्यातील शेतकऱ्यांना जी मदत मिळणार आहे त्याप्रमाणे कोपरगाव मतदार संघातील शेतकऱ्यांना जास्तीत जास्त मदत मिळावी अशी मागणी केली.
जिल्हा परिषदेच्या जलजीवन मिशनच्या पाणी पुरवठा योजनांच्या वीज कनेक्शन अभावी पंधरा योजना सुरु होणे बाकी आहे. त्यासाठी आवश्यक असणाऱ्या निधीची अडचण जिल्हा नियोजन समितीच्या माध्यमातून सोडवावा अशी मागणी आ. आशुतोष काळे यांनी पालकमंत्री ना. विखे पाटील यांच्या कडे केली असून या मागणीला विखे पाटील यांनी सकारात्मक प्रतिसाद दिला आहे.महायुती शासनाणे संवेदनशीलता दाखवत दुष्काळ जाहीर केला त्याबद्दल राज्याचे मुख्यमंत्री देवेंद्रजी फडणवीस, उपमुख्यमंत्री श्रीम.सुनेत्राताई पवार, उपमुख्यमंत्री एकनाथजी शिंदे तसेच दुष्काळ निवारण समितीचे अध्यक्ष महसूलमंत्री चंद्रशेखर बावनकुळे, कृषी मंत्री दत्तात्रयजी भरणे, मदत पुनर्वसन मंत्री मकरंदजी जाधव तथा मकरंद आबा पाटील यांचे आभार मानले.
यावेळी विधानपरिषद सदस्य विवेक कोल्हे, गोदावरी दूध संघाचे अध्यक्ष राजेश परजणे, माजी नगराध्यक्ष पद्मकांत कुदळे, समता उद्योग समूहाचे अध्यक्ष काकासाहेब कोयटे, कर्मवीर शंकरराव काळे सहकारी साखर कारखान्याचे उपाध्यक्ष दिनार कुदळे आदींसह कर्मवीर शंकरराव काळे सहकारी साखर कारखाना व संलग्न संस्थांचे पदाधिकारी, राष्ट्रवादी काँग्रेस पक्षाचे पदाधिकारी, आजी-माजी नगरसेवक, माजी जिल्हा परिषद व पंचायत समिती सदस्य, महसूल, कृषी, जलसंपदा विभागाचे अधिकारी तसेच शेतकरी उपस्थित होते.
चौकट:-२०१६ मध्ये ज्यावेळी दुष्काळ सदृश्य निर्माण झाली त्यावेळी जलसंपदा विभागाकडून गोदावरी कालव्याच्या लाभधारक शेतकऱ्यांना अडीच किलोमीटरपर्यंतच आवर्तनाचा लाभ दिला जात होता. शेतकऱ्यांच्या अडचणींची गांभीर्याने दखल घेवून जास्तीत जास्त शेतकऱ्यांपर्यंत पाणी कसे पोहोचेल याची काळजी घ्यावी आणि कृपा करून अडीच किलोमीटर पर्यंतची अट लावू नका. आवर्तनाचा जो काही लाभ देणार आहे तो सरसकट सर्वच शेतकऱ्यांना द्या.-आ.आशुतोष काळे.
