जेऊर कुंभारी वार्ताहर
जेऊर कुंभारी येथील श्री मारुती मंदिर परिसरात शेतकऱ्यांचा पारंपरिक आणि जिव्हाळ्याचा बैलपोळा सण उत्साहपूर्ण व भक्तिमय वातावरणात साजरा करण्यात आला. वर्षभर शेतात कष्ट करणाऱ्या सर्जा-राजाप्रती कृतज्ञता व्यक्त करत शेतकऱ्यांनी बैलांना आकर्षक पद्धतीने सजवून त्यांची विधिवत पूजा केली.
यावेळी बैलांना रंगीबेरंगी झूल, गोंडे, घुंगरांच्या माळा तसेच विविध सजावटीच्या साहित्याने सजविण्यात आले होते. सजविलेल्या बैलजोड्या पाहण्यासाठी ग्रामस्थांची मोठी गर्दी झाली होती. मारुती मंदिर परिसरात बैलांची पूजा करून नैवेद्य दाखविण्यात आला.
शेतकरी नारायण गुरसळ, शशिकांत गुरसळ, सागर गुरसळ, अक्षय चव्हाण, प्रविण देवकर, मार्तंड जाधव यांनी आपल्या सजविलेल्या बैलजोड्या मारुती मंदिरात दर्शनासाठी आणल्या. यावेळी बैलांच्या आकर्षक सजावटीने उपस्थितांचे लक्ष वेधून घेतले.
बैलपोळा हा केवळ सण नसून शेतकरी आणि बैल यांच्यातील अतूट नात्याचा, कृतज्ञतेचा आणि कृषी संस्कृतीचा उत्सव मानला जातो. या निमित्ताने जेऊर कुंभारी ग्रामस्थांनी पारंपरिक पद्धतीने सण साजरा करत आपल्या समृद्ध कृषी परंपरेचे जतन केले.
यावेळी उपसरपंच जालिंदर चव्हाण, भाजपा युवामोर्चा तालुकाध्यक्ष किशोर गायकवाड,भास्कर चव्हाण, रामभाऊ वक्ते, किरण वक्ते, प्रा. मधुकर वक्ते, राहुल वक्ते,
मनोज चोपडे,
विजय वक्ते, अक्षय गुरसळ, बाळासाहेब राऊत, अमित भोंगळे,गणेश पोटे, राणा वक्ते, किरण गुरसळ, आदर्श मोकळ यांच्यासह ग्रामस्थ मोठ्या संख्येने उपस्थित होते.
