१५ ते १७ ऑगस्टदरम्यान विविध धार्मिक कार्यक्रमांचे आयोजन; महाप्रसादाने सोहळ्याची सांगता!!
जेऊर कुंभारी वार्ताहर
जेऊर कुंभारी येथील श्री गंगेश्वर महादेव मंदिराच्या प्राणप्रतिष्ठा सोहळ्याचे आयोजन शनिवार दि. १५ ऑगस्ट ते सोमवार दि. १७ ऑगस्ट २०२६ या कालावधीत करण्यात आले आहे. जेऊर कुंभारी पंचक्रोशीतील भाविक भक्तांसह परिसरातील नागरिकांना या धार्मिक सोहळ्यास उपस्थित राहण्याचे आवाहन समस्त ग्रामस्थांच्या वतीने करण्यात आले आहे.
प्राणप्रतिष्ठा सोहळ्यानिमित्त तीन दिवस विविध धार्मिक विधी व कार्यक्रम होणार आहेत. शनिवार, दि. १५ ऑगस्ट रोजी सकाळी ९ ते १२.३० या वेळेत प्रायश्चित्त, प्रधान संकल्प, पंचांग विधी, वास्तुपूजन व मूर्ती जलाधिवास आदी धार्मिक विधी होतील. दुपारी २.३० ते सायंकाळी ६ या वेळेत देवता स्थापन, ग्रहस्थापन, अग्निनिर्माण, ग्रह हवन तसेच सायंकाळी पूजन व आरती होणार आहे.
रविवार, दि. १६ ऑगस्ट रोजी सकाळी ९ ते १२.३० या वेळेत शांती सूक्तपाठ, स्थापित देवता पूजन, मूर्ती स्नपन संस्कार, प्रसाद स्थापना व मूर्ती संस्कार करण्यात येणार आहेत. दुपारी २.३० ते सायंकाळी ६ या वेळेत प्रधान देवता हवन, मूर्ती शय्यादिवस, धान्याधिवास तसेच सायंकाळी पूजन व आरती होईल.
सोमवार, दि. १७ ऑगस्ट रोजी सकाळी ९ ते १२.३० या वेळेत शांती सूक्तपाठ, स्थापित देवता पूजन, न्यासअंग हवन, प्राणप्रतिष्ठा, बलिदान व पूर्णाहुती आदी प्रमुख धार्मिक विधी पार पडतील. त्यानंतर आरती व त्यानंतर धार्मिक कार्यक्रमांची सांगता होणार आहे.
या सोहळ्याच्या निमित्ताने सोमवार दि. १७ ऑगस्ट रोजी दुपारी २ वाजता महाप्रसादाचे आयोजन करण्यात आले आहे. भाविकांनी मोठ्या संख्येने उपस्थित राहून श्री गंगेश्वर महादेवांचे दर्शन व प्राणप्रतिष्ठा सोहळ्याचा आध्यात्मिक लाभ घ्यावा, असे आवाहन समस्त ग्रामस्थ जेऊर कुंभारी यांच्या वतीने करण्यात आले आहे.
