जेऊर कुंभारी वार्ताहर
आषाढी वारीचे औचित्य साधून जिल्हा परिषद प्राथमिक शाळा गावठाण शाळेत कुंभारी शुक्रवार (दि. २४ जुलै) रोजी बालचमूंच्या सहभागातून पारंपरिक बालदिंडी सोहळा मोठ्या उत्साहात आणि भक्तिमय वातावरणात साजरा करण्यात आला.
यावेळी विद्यार्थ्यांनी आकर्षक पद्धतीने पालखीची सजावट केली होती. पालखीत श्री विठ्ठल-रुक्मिणी यांच्या मूर्ती व प्रतिमा ठेवून पुष्पहार अर्पण करण्यात आला तसेच फुलांनी सजावट करण्यात आली होती. सकाळी १० वाजता शाळेपासून बालदिंडीला प्रारंभ झाला. “विठ्ठल… विठ्ठल…” नामघोष, टाळ-मृदुंगाचा गजर आणि साऊंडच्या तालावर विद्यार्थ्यांनी उत्साहाने दिंडीत सहभाग घेतला.
दिंडी गावातील प्रमुख मार्गाने तलाठी कार्यालयासमोर पोहोचल्यानंतर मोठे रिंगण करण्यात आले. “विठ्ठल नामाची शाळा भरली” या गीतावर विद्यार्थ्यांनी मनमोहक नृत्य सादर करून उपस्थितांची मने जिंकली. त्यानंतर ग्रामपंचायत कार्यालयासमोर दुसरे गोल रिंगण करण्यात आले. “धनी मला बी दाखव ना विठुरायाची पंढरी” या गीतावर विद्यार्थिनींनी फुगडी खेळत भक्तिरसात रंग भरला.
यानंतर बालदिंडी श्री मारुती मंदिर आणि श्री गंगेश्वर महादेव मंदिर येथे पोहोचली. दिंडीत गावातील महिला व पुरुषांनीही मोठ्या संख्येने सहभाग नोंदविला. चित्राताई गायकवाड यांनी सादर केलेल्या विठ्ठल भक्तीगीतांमुळे वातावरण अधिकच भक्तिमय झाले. गंगेश्वर महादेव मंदिरासमोर विद्यार्थ्यांनी टाळ-मृदुंगाच्या गजरात फुगड्या खेळत मोठे गोल रिंगण केले. हे रिंगण सोहळ्याचे प्रमुख आकर्षण ठरले.
कार्यक्रमाच्या समारोपप्रसंगी शाळेचे मुख्याध्यापक रमेश गुरसळ यांनी बालवारकरी तसेच दिंडीत सहभागी झालेल्या महिला-पुरुषांना केळी व फरसाणाचे वाटप केले. कार्यक्रमाच्या यशस्वी आयोजनासाठी उपाध्यापिका श्रीमती नलिनी भालेराव तसेच शाळा पोषण आहार स्वयंपाकी सौ. मंदा राजेंद्र परसैय्या यांचे मोलाचे सहकार्य लाभले.
