कोपरगाव प्रतिनिधी
कोपरगाव तालुक्यातील जिल्हा परिषद प्राथमिक शाळा गिरमेवस्ती येथे आषाढी एकादशीच्या निमित्ताने ‘चिमुकल्यांची वारी’ बाल दिंडी सोहळा मोठ्या उत्साहात व भक्तिमय वातावरणात साजरा करण्यात आला.यावेळी विद्यार्थ्यांनी वारकऱ्यांच्या वेशभूषेत सहभागी होत टाळ-मृदंगाच्या गजरात तसेच विठ्ठल-रखुमाईच्या जयघोषात बाल दिंडी काढली. कार्तिक देवकर यांनी विठ्ठलाची तर आर्वी देवकर हिने रुक्मिणीची वेशभूषा साकारली होती. ‘ज्ञानोबा-तुकाराम’, ‘विठ्ठल विठ्ठल जय हरी विठ्ठल’ अशा जयघोषाने परिसर भक्तिमय झाला.
बाल दिंडीचा मार्ग गिरमेवस्ती शाळा ते संजयनगर गणपती मंदिर असा होता. विद्यार्थ्यांनी अभंग, भारुडे, गजर व पारंपरिक वारकरी वेशभूषेद्वारे महाराष्ट्राच्या समृद्ध वारकरी परंपरेचे दर्शन घडविले. याप्रसंगी अनुज ढुमणे सरांनी फलकावर रेखाटलेले विठ्ठलाचे चित्र आकर्षणाचा केंद्रबिंदू ठरले.
या कार्यक्रमातून विद्यार्थ्यांना संतपरंपरा, वारकरी संस्कृती, भक्तीभाव आणि सामाजिक एकतेची शिकवण मिळाली. कार्यक्रमाच्या यशस्वी आयोजनासाठी मुख्याध्यापिका वंदना पर्वत,शिक्षक अनुज ढुमणे, ज्योती गोर्डे विद्यार्थी, पालक व ग्रामस्थांनी परिश्रम घेतले. यावेळी अंगणवाडी सेविका सिंधुताई वक्ते, मदतनीस सुमनताई होन पालक व ग्रामस्थ यांनी मोठ्या संख्येने उपस्थित राहून बाल दिंडीचे कौतुक केले.
