जेऊर कुंभारी वार्ताहर
कोपरगाव वकील संघाच्या उपाध्यक्षपदी जेऊर कुंभारी येथील युवा विधिज्ञ ॲड. निलेश रामभाऊ कातकडे यांची बिनविरोध निवड झाल्याबद्दल गावात आनंदाचे वातावरण निर्माण झाले आहे. त्यांच्या निवडीबद्दल जेऊर कुंभारी येथे ग्रामस्थांच्या वतीने जाहीर सत्कार समारंभाचे आयोजन करण्यात आले.
या प्रसंगी ॲड. निलेश कातकडे यांचा शाल, श्रीफळ व पुष्पगुच्छ देऊन सन्मान करण्यात आला. कार्यक्रमात बोलताना संचालक सतीशराव आव्हाड यांनी सांगितले की, “ॲड. निलेश कातकडे यांची उपाध्यक्षपदी झालेली निवड ही संपूर्ण जेऊर कुंभारी गावासाठी अभिमानाची बाब आहे. त्यांनी मेहनत, प्रामाणिकपणा आणि अभ्यासाच्या जोरावर हे स्थान मिळवले आहे. त्यांच्या यशामुळे गावातील तरुणांना नक्कीच प्रेरणा मिळेल. त्यांनी पुढेही न्यायासाठी निष्ठेने काम करत गावाचे आणि तालुक्याचे नाव उज्ज्वल करावे, हीच अपेक्षा आहे.”त्यांच्या मनोगताला उपस्थितांनी टाळ्यांच्या गजरात दाद दिली.
यावेळी संचालक सतिशराव आव्हाड,बाळासाहेब वक्ते, माजी सभापती शिवाजीराव वक्ते, माजी सरपंच विठ्ठलराव आव्हाड, विलास आव्हाड,विजय रोहम, मधुकर वक्ते, रमेश वक्ते यांच्यासह ग्रामस्थ मोठ्या संख्येने उपस्थित होते. उपस्थित मान्यवरांनी ॲड. निलेश कातकडे यांचे अभिनंदन करून त्यांच्या भावी वाटचालीस शुभेच्छा दिल्या.
कार्यक्रमाचे सूत्रसंचालन विजय रोहम यांनी केले, तर आभार प्रदर्शन संचालक सतीशराव आव्हाड यांनी मानले.
