जेऊर कुंभारी वार्ताहर
कोपरगाव वकील संघाच्या उपाध्यक्षपदी जेऊर कुंभारी येथील अॅड. निलेश रामभाऊ कातकडे यांची बिनविरोध निवड झाली असून, त्यांच्या निवडीमुळे गावासह परिसरात आनंदाचे वातावरण निर्माण झाले आहे. गेली १४ वर्षे कोपरगाव न्यायालयात वकिली व्यवसाय करत असलेल्या अॅड. कातकडे यांनी आपल्या अभ्यासू वृत्ती, न्यायालयीन कामकाजातील कौशल्य, व्यावसायिक प्रामाणिकपणा आणि सहकारी वकिलांशी जपलेल्या सुसंवादाच्या बळावर कायदे क्षेत्रात वेगळी ओळख निर्माण केली आहे. त्यांच्या कार्याची दखल घेत त्यांच्यावर कोपरगाव वकील संघाच्या उपाध्यक्षपदाची जबाबदारी सोपविण्यात आली.
या निवडीबद्दल जेऊर कुंभारी ग्रामस्थांच्या वतीने अॅड. कातकडे यांचा श्रीफळ व पुष्पगुच्छ देऊन सत्कार करण्यात आला. यावेळी ग्रामपंचायतीचे उपसरपंच यशवंतराव आव्हाड, पोलीस पाटील बाळासाहेब गायकवाड, भाजप युवा मोर्चाचे सचिव किशोर गायकवाड, सामाजिक कार्यकर्ते कैलास चव्हाण, नामदेव वक्ते,प्रा. मधुकर वक्ते ,गणेश पोटे उपस्थित होते.
यावेळी उपस्थित मान्यवरांनी अॅड. कातकडे यांच्या कार्याचा गौरव करत, त्यांनी गेल्या १४ वर्षांत न्यायव्यवस्थेप्रती निष्ठा जपत सर्वसामान्य नागरिकांना न्याय मिळवून देण्यासाठी मोलाचे योगदान दिल्याचे सांगितले. त्यांच्या अनुभवाचा आणि नेतृत्वगुणांचा लाभ कोपरगाव वकील संघाला निश्चितच होईल, असा विश्वासही त्यांनी व्यक्त केला.
सुत्रसंचालन कैलास चव्हाण यांनी केले व आभार उपसरपंच यशवंतराव आव्हाड यांनी मानले.
