कोपरगाव प्रतिनिधी
जेऊर कुंभारी येथील प्रगतशील शेतकरी धनंजय रोहोम पाटील यांच्या कन्या कु. सिद्धी रोहोम यांनी एमबीबीएस पदवी संपादन करून वैद्यकीय क्षेत्रात उल्लेखनीय यश प्राप्त केले आहे. त्यांच्या या यशामुळे रोहोम कुटुंबासह संपूर्ण परिसरात आनंदाचे वातावरण निर्माण झाले असून सर्व स्तरांतून त्यांचे अभिनंदन केले जात आहे.
आत्मा मलिक इंग्लिश मिडीयम गुरुकुलमध्ये शिक्षणाची मुहूर्तमेढ रोवलेल्या सिद्धी यांनी लहानपणापासूनच अभ्यासात सातत्य, मेहनत आणि शिस्त यांचा उत्तम समन्वय साधला. वैद्यकीय शिक्षणातील विविध टप्पे यशस्वीपणे पार करत त्यांनी ‘डॉक्टर’ होण्याचे स्वप्न साकार केले.
शेतकरी कुटुंबातील कन्येने मिळविलेल्या या यशामुळे जेऊर कुंभारी गावाच्या शिरपेचात मानाचा तुरा खोवला गेला आहे. यानिमित्त आयोजित सत्कार समारंभात संचालक बाळासाहेब वक्ते, माजी सभापती शिवाजी वक्ते, माजी संचालक प्रा. मधुकर वक्ते विजय रोहम,तसेच रमेश वक्ते आदी मान्यवरांच्या हस्ते पुष्पगुच्छ देऊन डॉ. सिद्धी रोहोम यांचा सन्मान करण्यात आला.
यावेळी उपस्थित मान्यवरांनी त्यांच्या भावी वाटचालीस शुभेच्छा देत यशाबद्दल कौतुक व्यक्त केले. याप्रसंगी बोलताना संचालक बाळासाहेब वक्ते म्हणाले, “ग्रामीण भागातील विद्यार्थिनी उच्च शिक्षणाच्या माध्यमातून मोठी भरारी घेत असून डॉ. सिद्धी रोहोम यांचे यश हे त्याचे उत्तम उदाहरण आहे. कष्ट, जिद्द आणि गुणवत्तेच्या बळावर त्यांनी एमबीबीएस पदवी प्राप्त करून कुटुंबासह गावाचे नाव उज्ज्वल केले आहे. त्यांची ही कामगिरी ग्रामीण भागातील विद्यार्थ्यांसाठी प्रेरणादायी असून भविष्यात त्यांनी वैद्यकीय सेवेच्या माध्यमातून समाजाप्रती असलेले कर्तव्य यशस्वीपणे पार पाडावे, अशी अपेक्षा आहे.”
डॉ. सिद्धी रोहोम यांच्या या यशस्वी वाटचालीमुळे ग्रामीण भागातील विद्यार्थिनींना उच्च शिक्षणासाठी नवी प्रेरणा मिळाली असून त्यांच्या उज्ज्वल भविष्यासाठी सर्व स्तरांतून शुभेच्छांचा वर्षाव होत आहे.
