कोपरगाव प्रतिनिधी
धारणगाव येथील जिल्हा परिषद प्राथमिक शाळेत भारतरत्न डॉ. बाबासाहेब आंबेडकर यांची जयंती अत्यंत उत्साहात आणि प्रेरणादायी वातावरणात साजरी करण्यात आली. या कार्यक्रमाच्या अध्यक्षस्थानी शाळा व्यवस्थापन समितीचे अध्यक्ष निलेश रणशूर होते. मान्यवरांच्या हस्ते महामानवाच्या प्रतिमेचे पूजन करून कार्यक्रमाची रीतसर सुरुवात करण्यात आली. कार्यक्रमाचे खास आकर्षण म्हणजे शुभम रणशूर या विद्यार्थ्याने केलेली डॉ. बाबासाहेब आंबेडकरांची वेशभूषा. हातात संविधानाची प्रत घेऊन उभा असलेला शुभम सर्वांचे लक्ष वेधून घेत होता.
याप्रसंगी वैष्णवी रणशूर, सार्थक मोरे आणि मनस्वी कदम या विद्यार्थ्यांनी बाबासाहेबांच्या जीवनकार्यावर प्रभावी भाषणे केली. या बालवक्त्यांचे कौतुक करत मान्यवरांच्या हस्ते त्यांना पुस्तके भेट देऊन सन्मानित करण्यात आले. शिक्षिका वैशाली सोनवणे, माजी अध्यक्ष बाळू मोरे, निलेश रणशूर आणि नवनाथ सूर्यवंशी यांनी आपल्या मनोगतातून बाबासाहेबांच्या कार्याचा गौरव केला. अध्यक्षीय भाषणात निलेश रणशूर यांनी विद्यार्थ्यांना मोलाचा संदेश देताना सांगितले की, “जिद्द, चिकाटी आणि मेहनत केल्याने यश नक्की मिळते, त्यासाठी विद्यार्थ्यांनी पुस्तकांना आपले मित्र बनवावे.” तर बाळू मोरे यांनी बाबासाहेबांचे देशासाठी असलेले महान योगदान अधोरेखित केले.
कार्यक्रमाचे औचित्य साधून सुभाष रणशूर यांनी शाळेच्या भौतिक विकासासाठी १५०० रुपयांची देणगी दिली, तर बाळू मोरे व सुभाष रणशूर यांच्या वतीने विद्यार्थ्यांना खाऊचे वाटप करण्यात आले. या कार्यक्रमास काशिनाथ रणशूर, रामदास रणशूर, देविदास नन्नवरे, भीमराव खळे, सिद्धार्थ रणशूर, चैतन्य रणशूर, संदीप पाठक, भामबाई चव्हाण, दिपाली वाघ, अंगणवाडी सेविका वनिता चौधरी, मदतनीस माधुरी नन्नवरे यांच्यासह ग्रामस्थ आणि विद्यार्थी मोठ्या संख्येने उपस्थित होते. हा सोहळा यशस्वी करण्यासाठी मुख्याध्यापक नवनाथ सूर्यवंशी, शिक्षिका वैशाली सोनवणे व दिपाली वाघ यांनी विशेष परिश्रम घेतले. कार्यक्रमाचे सूत्रसंचालन मुख्याध्यापक नवनाथ सूर्यवंशी यांनी केले, तसेच त्यांनी शाळेला आर्थिक मदत करणाऱ्यांचे व खाऊ वाटप करणाऱ्यांचे आभार मानून कार्यक्रमाचा समारोप केला.
