कोपरगाव प्रतिनिधी
धारणगाव: कुंभारी येथे आयोजित ‘माजी विद्यार्थी स्नेह संमेलन २०२६’ च्या निमित्ताने एकत्र आलेल्या माजी विद्यार्थ्यांनी सामाजिक बांधिलकी जपत जिल्हा परिषद प्राथमिक शाळा, धारणगाव आणि येथील अंगणवाडीतील विद्यार्थ्यांना लेखन साहित्याचे वाटप केले. विद्यार्थ्यांच्या शैक्षणिक वाटचालीत आपलाही खारीचा वाटा असावा, या उदात्त हेतूने राबविलेल्या या उपक्रमाचे सर्वत्र कौतुक होत आहे.
कुंभारी येथे झालेल्या या स्नेह संमेलनामध्ये प्रमोद दिलीप चौधरी, राहुल वहाडणे, महेश थोरात, शाळा व्यवस्थापन समितीचे अध्यक्ष निलेश रणशूर आणि माजी उपसरपंच गणेश थोरात यांनी विशेष पुढाकार घेतला. त्यांनी केवळ मातृशाळेच्या आठवणींना उजाळा न देता, धारणगाव येथील जि. प. प्राथमिक शाळा आणि अंगणवाडीतील चिमुकल्यांना वह्या, पेन, पेन्सिल व इतर आवश्यक शैक्षणिक साहित्यांचे वाटप करून समाजासमोर एक उत्तम आदर्श ठेवला आहे.
शाळेला मदत करणारे दुर्मिळ: मुख्याध्यापक नवनाथ सूर्यवंशी
याप्रसंगी जि. प. प्राथमिक शाळा, धारणगावचे मुख्याध्यापक नवनाथ सूर्यवंशी यांनी देणगीदार माजी विद्यार्थ्यांचे विशेष आभार मानले. कृतज्ञता व्यक्त करताना ते म्हणाले, “आजच्या काळात शाळेसाठी आणि विद्यार्थ्यांच्या प्रगतीसाठी कोणतीही अपेक्षा न ठेवता, निस्वार्थ भावनेने मदत करणारे फार कमी व्यक्ती असतात. या माजी विद्यार्थ्यांनी दाखवलेली ही दातृत्व भावना आमच्या विद्यार्थ्यांसाठी नक्कीच प्रेरणादायी आणि प्रोत्साहन देणारी ठरेल.”
या छोटेखानी पण महत्त्वपूर्ण कार्यक्रमाला शाळेतील शिक्षिका वैशाली सोनवणे, दिपाली वाघ, अंगणवाडी सेविका वनिता चौधरी आणि मदतनीस माधुरी नन्नवरे यांच्यासह ग्रामस्थ आणि विद्यार्थी उपस्थित होते. विद्यार्थ्यांच्या चेहऱ्यावरील आनंद पाहून या उपक्रमाचा उद्देश खऱ्या अर्थाने सफल झाल्याची भावना उपस्थितांनी व्यक्त केली.
