जेऊर कुंभारी वार्ताहर
कोपरगाव येथील पत्रकार बिपिन गायकवाड यांच्या निधनाने पत्रकारिता क्षेत्रात हळहळ व्यक्त होत असतानाच त्यांच्या कुटुंबाला आधार देण्यासाठी महाराष्ट्र राज्य पत्रकार संघटनेने पुढाकार घेतला आहे. राज्य संघटक संजय भोकरे व प्रदेश कार्याध्यक्ष निलेश सोमाणी यांच्या सुचनेनुसार संघटनेच्या वतीने प्रदेश सरचिटणीस व समर्थ गावकरीचे संपादक डॉ.विश्वास आरोटे यांनी गायकवाड यांच्या कुटुंबाला २१ हजार रुपयांची आर्थिक मदत तसेच किराणा सामान देऊन सांत्वन करण्यात आले आहे.
या प्रसंगी संघटनेच्या पदाधिकाऱ्यांनी गायकवाड कुटुंबीयांची भेट घेत त्यांचे सांत्वन केले. पत्रकार बिपिन गायकवाड यांनी पत्रकारितेत प्रामाणिकपणे काम करत समाजातील विविध प्रश्नांना वाचा फोडली होती. त्यांच्या अचानक निधनामुळे पत्रकार क्षेत्रात मोठी पोकळी निर्माण झाली असल्याची भावना उपस्थितांनी व्यक्त केली.
महाराष्ट्र राज्य पत्रकार संघटनेच्या वतीने दिलेली ही मदत म्हणजे पत्रकार बंधुभावाचे प्रतीक असून अडचणीच्या काळात पत्रकार कुटुंबासोबत उभे राहण्याचा प्रयत्न असल्याचे डॉ. आरोटे यांनी सांगितले.
याप्रसंगी दैनिक समर्थ गावकरी या वृत्तपत्राचे व्यवस्थापक संजय फुलसुंदर,तालुका अध्यक्ष जनार्दन जगताप, सचिव विजय कापसे ,फकीर टेके,किसन पवार, मधुकर वक्ते आदीसह उपस्थितांनी दिवंगत पत्रकार बिपिन गायकवाड यांना श्रद्धांजली अर्पण करत त्यांच्या कुटुंबीयांना धीर दिला. तसेच भविष्यातही आवश्यक त्या मदतीसाठी संघटना कायम सोबत राहील, अशी ग्वाही देण्यात आली. यावेळी गायकवाड कुटुंबातील त्यांची पत्नी कविता गायकवाड, महेश गायकवाड, कल्याणी गायकवाड, जागृती गायकवाड, प्रकाश गायकवाड आदी परिवारातील सदस्य उपस्थित होते.
