कोपरगाव प्रतिनिधी
शिर्डी येथे परमपूज्य गणीनी भारत गौरव आर्यिका रत्न सौभाग्यमती माताजी यांच्या अवतरण दिवसानिमित्त आयोजित कार्यक्रमात कोपरगाव येथील युवा उद्योजक रोहित काले यांना जैन समाजाच्या वतीने “युवा उद्योजक” पुरस्कार प्रदान करण्यात आला.
जैन समाजातील प्रतिष्ठित सामाजिक कार्यकर्ते शिखरचंदजी कासलीवाल यांच्या हस्ते हा सन्मान करण्यात आला. रोहित काले यांच्या कालांश राजगिरा लाडू व चिक्की या उद्योगाद्वारे महिलांना रोजगाराची संधी उपलब्ध करून देत महिला बचत गटांना प्रोत्साहन देत असल्याबद्दल त्यांचे कौतुक करण्यात आले.
या कार्यक्रमास महाराष्ट्रातील प्रसिद्ध उद्योजक कैलासचंदजी भागचंदजी ठोळे, सतीशजी गंगवाल, किशोरजी गंगवाल, शितलजी पाटणी तसेच कोपरगाव, शिर्डी, श्रीरामपूर, संभाजीनगर, मालेगाव, लासलगाव, हैदराबाद, इंदूर व नाशिक येथील जैन समाजाचे अध्यक्ष, मान्यवर व महाराष्ट्रातील जैन समाजाच्या विश्वस्त मंडळाचे सदस्य उपस्थित होते.
यावेळी महिला बचत गटाच्या सौ. रेणुका काले, सौ. मनीषा काले तसेच कालांश उद्योगचे नितीन काले पुरस्कार स्वीकारण्यासाठी उपस्थित होते. कार्यक्रमात माताजींनी उद्योगास व सर्व महिला उद्योजकांना आशीर्वाद देत तरुणांनी उद्योग क्षेत्रात पुढे येऊन समाजासाठी प्रेरणादायी कार्य करावे, अशी अपेक्षा व्यक्त केली.
